PMC Road Mitra App – मागील पावसाळ्यात शहरातील रस्त्यांवर असलेल्या खड्ड्यांवरून महापालिका प्रशासनाच्या कारभारावर थेट राज्य शासनाकडून टीका झाल्यानंतर खडबडून जागे झालेल्या महापालिका प्रशासनाकडून शहरातील रस्त्यांची तक्रार थेट महापालिकेकडे यावी, या उद्देशाने पीएमसी रोड मित्र हे मोबाइल अॅप सुरू केले. मात्र, अवघ्या सहा महिन्यांतच हे अॅप बंद पडले आहे. धक्कादायक बाब म्हणजे महापालिकेच्या माहिती आणि तंत्रज्ञान विभाग, तसेच पथ विभागासही हे अॅप बंद असल्याची कोणतीही कल्पना नाही. त्यामुळे शहरातील खड्डे आणि रस्त्यांच्या दूरवस्थेबाबत प्रशासन किती गंभीर आहे, हे पुन्हा एकदा समोर आले आहे. महापालिका आयुक्त नवल किशोर राम यांच्या हस्ते १२ ऑगस्ट २०२५ रोजी या अॅपचे अनावरण करण्यात आले होते. नागरिकांनी रस्त्यांवरील खड्ड्यांचे फोटो किंवा व्हिडिओ काढून अॅपवर अपलोड केल्यास ते थेट पथ विभागाकडे पोहोचतील आणि ७२ तासांत खड्डे बुजवले जातील, असा दावा त्या वेळी प्रशासनाने केला होता. खड्डा बुजविण्याची जबाबदारी संबंधित उपअभियंत्यावर निश्चित केली जाईल आणि काम पूर्ण झाल्यानंतर पूर्वी व नंतरचे फोटो अपलोड करून तक्रार बंद केली जाईल, अशीही व्यवस्था या अॅपमध्ये केली होती. नागरिकांकडून येणार्या तक्रारींचे निरीक्षण करण्यासाठी विशेष डॅशबोर्डही तयार केला होता. कोणत्या क्षेत्रातून किती तक्रारी आल्या, त्या किती कालावधीत निकाली काढल्या, याची माहिती वरिष्ठ अधिकार्यांना मिळणार होती. त्यामुळे अधिकार्यांची जबाबदारी निश्चित केली जाणार होती. शासनाचीही केली फसवणूक? राज्यात विधानसभा निवडणुकीनंतर मुख्यमंत्री देवेंद्र फडणवीस यांनी प्रशासकीय कामात गतिमानता आणण्यासाठी राज्यातील महापालिकांसाठी १५० दिवसांच्या सुधारणा कार्यक्रमांची घोषणा केली. त्यात महापालिकांनी वेगवेगळ्या लोकपयोगी सेवा उपलब्ध करून देण्याच्या सूचना केल्या. महापालिकेने पीएमसी रोड मित्र ऍप, पीएमसी केअर २.०, चॅटबाॅट, तसेच इतर काही सुविधा सुरू केल्याची माहिती या अभियानात दिली. त्यानंतर महापालिकेचा राज्य पातळीवर प्रशासकीय सुधारणेत गौरवही झाला. मात्र, आता यातील अनेक सेवा बंद अवस्थेत आहेत. त्यामुळे प्रशासन केवळ स्पर्धांपुरते अशा सुविधा देत असल्याचे पुन्हा एकदा स्पष्ट झाले आहे. “अॅप बंद असल्याचे समोर आले आहे. संबंधित विभागांना तत्काळ हे अॅप सुरू करण्याच्या सूचना दिल्या आहेत. नागरिकांसाठी लवकरच हे अॅप कार्यरत केले जाईल.” – नवल किशोर राम, आयुक्त, पुणे महापालिका
