PMC News – महापालिकेच्या सार्वजनिक वास्तू, रस्ते, चौक आणि उद्यानांना आता नगरसेवकांना हवे ते नाव देण्याचा मार्ग महापालिकेच्या सर्वपक्षीय नेत्यांनी एकत्र येत मोकळा केला आहे. महापालिकेने नावे देताना राष्ट्रीय नेते किंवा विविध क्षेत्रांत उल्लेखनीय कार्य केलेल्या व्यक्तीची नावे द्यावीत, अशी अट घातली होती. मात्र, हा निर्णयच महापालिकेच्या पक्षनेत्यांच्या बैठकीत रद्द करण्यात आला आहे. महापौर मंजूषा नागपुरे यांच्या अध्यक्षतेखाली ५ मे रोजी सत्ताधारी आणि विरोधी पक्षांच्या नेत्यांची बैठक झाली होती. या बैठकीत जुना ठराव रद्द करण्याचा निर्णय घेण्यात आला. महापालिका अधिनियमात याबाबत स्पष्ट तरतूद नसल्याचे कारण देण्यात आले. त्यामुळे आता नगरसेवक एखाद्या प्रभागात एकाच पक्षाचे सर्व नगरसेवक असल्यास ते आपल्याला हवे ते नाव देऊ शकणार आहेत. महापालिका निवडणुका झाल्यानंतर पालिकेच्या सार्वजनिक वास्तू, रस्ते, चौक, उद्यान, इमारतींना नावे देण्यासाठी नाव समितीची स्थापना केली जाते. त्यानुसार या नावे देण्यासाठी पक्षनेत्यांकडून नियमावली अंतिम केली जाते. महापालिका निवडणुकीनंतरही प्रशासनाकडून याबाबतची नियमावली ठरविण्यात आली होती. त्यात यापूर्वी महापालिकेच्या रस्ते, उद्याने, शाळा, रुग्णालये, नाट्यगृहे, उड्डाण पूल आणि इतर सार्वजनिक वास्तूंना स्वातंत्र्यसैनिक, साहित्यिक, क्रीडापटू, सांस्कृतिक क्षेत्रातील मान्यवर, तसेच शहरासाठी योगदान देणाऱ्या व्यक्तींची नावे देण्यात येत होती. या माध्यमातून त्या व्यक्तींचे कार्य नागरिकांच्या स्मरणात राहावे, हा उद्देश होता. मात्र, आता ही नियमाची २६ वर्षे जुनी तरतूदच रद्द केल्याने आता नगरसेवकांना हवे ते नाव देण्याचा मार्ग मोकळा झाला आहे. त्यातच बाणेर येथील कर्करोग रुग्णालयाला स्थायी समिती अध्यक्ष श्रीनाथ भिमाले यांच्या वडिलांचे नाव देण्याचा प्रकार घडल्यानंतर पक्षनेत्यांच्या या नवीन नियमावलीमुळे नगरसेवकांना आता नातेवाईकांच्या नावानेही चमकोगिरीचा मार्ग मोकळा होणार आहे.
