PMC News : क्रांतिसूर्य महात्मा ज्योतिबा फुले यांच्या २०० व्या जयंतीनिमित्त महापालिकेकडून एकही विशेष कार्यक्रम आयोजित करण्यात आला नसल्याने मुख्यसभेत नगरसेवकांनी तीव्र नाराजी व्यक्त केली. याबाबत प्रशासनाकडे वारंवार मागणी करूनही दुर्लक्ष झाल्याचा आरोप करत संबंधित अधिकाऱ्यांवर कारवाई करावी, अशी मागणी नगरसेवकांनी केली. पालिकेच्या शुक्रवारच्या एप्रिलमधील मुख्यसभेत महात्मा फुले वाडा स्मारक तसेच सावित्रीबाई फुले स्मारकाच्या एकत्रीकरणासाठी भूसंपादन करून मोबदला देण्याच्या धोरणाचा प्रस्ताव मान्यतेसाठी ठेवण्यात आला होता. यावेळी माजी महापौर प्रशांत जगताप यांनी पालिकेने महात्मा फुले यांच्या द्विशताब्दी जन्मवर्षानिमित्त नेमके कोणते कार्यक्रम आयोजित केले, असा सवाल उपस्थित केला. स्थायी समितीत यापूर्वी अनेकदा सूचना करूनही पालिकेने एवढ्या महत्त्वाच्या दिवशी केवळ फुलेवाडा येथे मंडप आणि ध्वनिक्षेपक लावण्यापुरतीच मर्यादित तयारी केल्याचा आरोप करण्यात आला. या प्रकरणी संबंधित अधिकाऱ्यांनी खुलासा करावा, अशी मागणीही सदस्यांनी केली. प्रशांत जगताप, नगरसेवक, पुणे महानगरपालिका यावेळी सांस्कृतिक विभागाच्या उपायुक्त आशा राऊत यांनी, द्विशताब्दी वर्षानिमित्त समता सप्ताह साजरा करण्याच्या सूचना सर्व महापालिका शाळा आणि विभागप्रमुखांना दिल्याचा खुलासा केला. मात्र, या उत्तरावर सदस्यांचे काही समाधान झाले नाही. महात्मा फुले यांचे समाजसुधारणेचे सर्व कार्य पुण्यात घडले असताना अशा त्यांच्या दोनशेव्या जयंतीकडे दुर्लक्ष होणे हा गंभीर प्रकार असल्याचे मत सदस्यांनी मांडले. सभागृह नेते गणेश बिडकर यांनी मध्यस्थी करत महापालिकेने पुढील वर्षभर विविध कार्यक्रम आयोजित करावेत आणि त्यासाठी स्वतंत्र समिती नेमावी, अशी सूचना केली. माजी महापौर वैशाली बनकर, गणेश कल्याणकर आणि डॉ. दादा केंद्रे यांनीही महात्मा फुले यांच्या कार्यावर आधारित मोठ्या प्रमाणावर उपक्रम राबवावेत, अशी मागणी केली. ही पालिकेची जबाबदारी महात्मा ज्योतिबा फुले हे महापालिकेचे सदस्य होते. त्यांनी स्त्री शिक्षणाची दारे खुली केली. अशा महापुरुषांचे द्विशताब्दी जन्मवर्ष व्याख्याने, सांस्कृतिक कार्यक्रम आणि विविध उपक्रमांच्या माध्यमातून साजरे करणे ही पालिकेची नैतिक जबाबदारी आहे. स्थायी समितीने यासाठी मान्यता दिली असून या कार्यक्रमांसाठी निधी उपलब्ध करून द्यावा, असे आदेश उपमहापौर परशुराम वाडेकर यांनी दिले. तसेच पिंपरी-चिंचवड महापालिकेच्या धर्तीवर पुणे पालिकेनेही वर्षभर कार्यक्रम आयोजित करावेत, अशा सूचनाही त्यांनी केल्या.
