PMC News – वैद्यकीय प्रवेशासाठीच्या नीट परीक्षेतील पेपरफुटी प्रकरणाचे धागेदोरे पुण्यातही असल्याचे पोलिसांच्या तपासात समोर आले आहे. या पोलीस या प्रकरणात प्रोग्रेसिव्ह एज्युकेशन सोसायटीच्या मॉडर्न महाविद्यालयाच्या प्राध्यापिका मनीषा मांढरे यांना अटक झाल्यानंतर महाविद्यालयाची मान्यता रद्द करावी तसेच महाविद्यालयाचे संचालक मंडळ बरखास्त करून त्यांच्यावर कारवाई करावी, अशी मागणी काँग्रेस आणि राष्ट्रवादी काँग्रेस शरदचंद्र पवार पक्षाच्या नगरसेवकांनी महापालिकेच्या सभागृहात केली. तसेच, राज्यशासन आणि केंद्र शासनाच्या विरोधात जोरदार घोषणाबाजीही केली. मात्र, महापालिकेत एकहाती सत्ता असलेल्या भाजपच्या एक-दोन नगरसेवकांव्यतिरिक्त कोणत्याही नगरसेवकांनी या आंदोलनाला विरोध केला नाही. या उलट भाजपचे पदाधिकारी बचावात्मक पवित्रा घेत असल्याचे दिसून आले. सर्वसाधारण सभा सुरू होताच काँग्रेसचे गटनेते ॲड. चंदूशेठ कदम आणि राष्ट्रवादी काँग्रेस शरदचंद्र पवार पक्षाचे गटनेते काकासाहेब चव्हाण यांच्या नेतृत्वाखाली नगरसेवकांनी महापौरांसमोरील जागेत येऊन घोषणाबाजी केली. नीट परीक्षा घोटाळा. तसेच, महाविद्यालयावर कारवाई करण्याची मागणी केली. यावेळी सभागृह नेते गणेश बिडकर यांनी हा विषय केंद्र सरकार आणि तपास यंत्रणांशी संबंधित असल्याचे सांगितले. मात्र, त्यानंतरही काॅंग्रेसच्या नगरसेवकांनी या घटनेच्या निषेधार्थ सभा तहकुबी मांडली. सभागृह नेते गणेश बिडकर यांनी त्यास विरोध केला. त्यानंतर, या तहकुबीवर नगरसचिव योगिता भोसले यांनी मतदान पुकारले. त्यात, सभा तहकुबीसाठीसाठी १८ नगरसेवकांनी अनुकूल मतदान केले तर ११८ नगरसेवकांनी तहकुबीच्या विरोधात मतदान केल्याने ही तहकूबी फेटाळण्यात आली. “महापालिका सभागृहात विरोधकांनी संस्था व माॅडर्न महाविद्यालयाच्या विरोधात जे आरोप केले आहेत, ते अत्यंत हास्यास्पद आहेत. नॅशनल टेस्टिंग एजन्सी अर्थात एनटीए ही नीटची परीक्षा घेत असते. त्यासाठी एनटीएकडून थेट शिक्षकांची नियुक्ती केली जाते. त्यात संस्था, महाविद्यालय आणि प्रशासनाचा काहीच सहभाग नसतो. याची काहीच माहिती न घेता संस्था व महाविद्यालयाच्या विरोधात सभागृहात आंदोलन करणे हास्यास्पद आहे. त्यांचा अभ्यास कमी पडतो, त्यांनी याबाबत माहिती घ्यावी व मग बोलावे. या प्रकरणी संस्थेने भूमिका स्पष्ट केली आहे. त्याचाच भाग म्हणून आजच संस्थेने संबंधित शिक्षिकेला निलंबित केले आहे.” – डाॅ. निवेदिता एकबोटे ( प्राचार्य, माॅर्डन महाविद्यालय)
