प्रभात वृत्तसेवा पुणे – शहरातील खड्डेमुक्त अभियानात निकृष्टपणे केलेले काम दोन अभियंते, तसेच ठेकेदाराला चांगलेच भोवले आहे. या प्रकाराची गंभीर दखल घेत महापालिका आयुक्तांनी वारजे कर्वेनगर क्षेत्रीय कार्यालयाचे कनिष्ठ अभियंता अमित हेरकर आणि उपअभियंता विनायक शिंदे यांना निलंबित करण्याचे आदेश दिले आहेत. याशिवाय हे काम करणाऱ्या जय शिवशंकर कन्स्ट्रक्शन या ठेकेदारास १ लाख रुपयांचा दंड केला आहे. महापालिकेने शहरात खड्डेमुक्त पुणे अभियान सुरू करून खड्डे दुरुस्तीसाठी एसओपी तयार करून दिली आहे. हे अभियान सुरू झाल्यानंतर त्याचे काम चांगल्या दर्जाचे होणे अपेक्षित होते. वारजे येथे महापालिकेच्या ठेकेदाराने मातीवर डांबरीकरण केले; पण व्यवस्थित दबाई न केल्याने डांबराचे थर निघून जात होते. हे काम निकृष्ट दर्जाचे झाल्याचा व्हिडिओ समाजमाध्यमावर व्हायरल झाल्यानंतर महापालिकेच्या कारभारावर प्रचंड टीका झाली होती. त्याची गंभीर दखल घेत आयुक्तांनी चौकशी करून कारवाईचे आदेश दिले होते. त्यानंतर पथ विभागाकडून ठेकेदाराला एक लाख रुपयांचा दंड, तसेच दोन्ही अभियंत्यांकडे अतिरिक्त पदभार असल्याने आणि त्यांची पहिलीच चूक असल्याने त्यांना केवळ ताकीद देण्याचा प्रस्ताव ठेवला होता. मात्र, आयुक्तांनी ठेकेदारास दंड करण्यासह दोन्ही अभियंत्यांना निलंबित करण्याचे आदेश दिले आहेत. आयुक्तांच्या या कारवाईने महापालिकेतील कामचुकार अधिकाऱ्यांनी धसका घेतल्याचे चित्र आहे. आयुक्तांनी केली पहाणी या मोहिमेत झालेल्या कामाची पहाणी मंगळवारी महापालिका आयुक्तांनी केली. टिळक रस्ता, स्वारगेट, शुक्रवार पेठ वाडिया रुग्णालय, कासेवाडी, राष्ट्रभूषण चौक, न्यू टिंबर मार्केट, रामोशी गेट येथील रस्त्यांच्या पॅचवर्कची पाहणी केली. शंकर शेठ रस्ता, सेव्हल लव्हज चौक, वर्धमान इमारत येथील रस्ता रुंदीकरण केल्याने वाहनांना अतिरिक्त जागा मिळाली आहे, त्याचीही पाहणी केली. या रस्त्यांमध्ये पावसाळी गटारांचे टेंबर, मलनिःसारणाचे चेंबर खचले आहेत, ते समपातळीत आणण्याचे आदेश दिले आहेत.
