प्रभात वृत्तसेवा पुणे – प्रभागासह शहरात सुरळीत पाणीपुरवठा व सक्षम ड्रेनेज व्यवस्था ही प्रत्येक नागरिकाची मूलभूत गरज आहे. प्रशासकीय समन्वय आणि नियोजनबद्ध विकासकामांच्या माध्यमातून प्रभाग १२ मधील पाणी व ड्रेनेज समस्यांवर कायमस्वरूपी उपाययोजना करू, अशी ग्वाही भाजप- आरपीआय (आठवले गट) मित्रपक्षांच्या प्रभाग १२ (ड ) मधील छत्रपती शिवाजीनगर – मॉडेल कॉलनीच्या उमेदवार प्राचार्या डॉ. निवेदिता गजानन एकबोटे यांनी दिली. प्रभागातील प्रचारादरम्यान त्यांनी आपटे रोड, भांडारकर रोड, प्रभात रोड आणि सेनापती बापट रोडवरील नागरिकांशी संवाद साधला. या वेळी डाॅ. एकबोटे म्हणाल्या, की अनेक भागांत पुनर्विकास वेगाने होत असला, तरी त्या प्रमाणात पाणीपुरवठा व ड्रेनेज व्यवस्थेचे सक्षमीकरण झालेले नाही. महापालिकेच्या माध्यमातून जुन्या पाइपलाइन बदलणे, पाणी गळती रोखणे आणि रखडलेल्या पाण्याच्या टाक्यांचे काम तातडीने पूर्ण करून घेण्यावर आपला भर असेल. यामुळे शिवाजीनगर पोलीस वसाहत, घोले रोड, एफसी रोड आणि जंगली महाराज रोड परिसरातील पाणीपुरवठा सुरळीत होण्यास मदत होईल. भविष्यातील पाण्याची गरज ओळखून ‘रेन वॉटर हार्वेस्टिंग’ प्रकल्प राबविण्यासाठी नागरिक आणि महापालिकेत समन्वय साधणारी स्वतंत्र समिती स्थापन करण्याचे आश्वासनही त्यांनी दिले.दरम्यान, वडारवाडी व मंजाळकर चौक येथून काढलेल्या पदयात्रेला नागरिकांनी उत्स्फूर्त प्रतिसाद दिला. या परिसरातील नागरिकांच्या समस्या सोडविण्यासाठी प्रयत्नशील असल्याचे डाॅ. एकबोटे म्हणाल्या. या पदयात्रेत डाॅ. गायत्री एकबोटे, मिलिंद एकबोटे, गणेश बगाडे, सुजाता शिरोळे, सुनीता श्रीधर, गौरी शिरोळे, सागर धोत्रे, राजेश धोत्रे, दत्ता घोगलू ,पंकज उणेचा, शुभम धोत्रे, राम म्हेत्रे ,अनिल पाटोळे, रफीक गोलंदाज , रफीक शेख, संतोष जगताप, राजू जाधव व वडारवाडी परिसरातील नागरिक, पदाधिकारी, कार्यकर्ते उपस्थित होते.
