PMC Election : पुणे महानगरपालिका सार्वत्रिक निवडणूक २०२६ च्या पार्श्वभूमीवर सुतारवाडी गावात प्रचाराचा धडाका पाहायला मिळत आहे. अपक्ष उमेदवार पुनम विशाल विधाते आणि अपक्ष उमेदवार प्रमोद अण्णा निम्हण यांच्या प्रचारार्थ काढण्यात आलेल्या पदयात्रेला ग्रामस्थांनी अभूतपूर्व प्रतिसाद दिला. ‘कपबशी’ आणि ‘शिट्टी’ या निवडणूक चिन्हांच्या घोषणांनी संपूर्ण परिसर दुमदुमून गेला होता. सुतारवाडीतील प्रमुख रस्ते, गल्ल्या आणि वाड्या-वस्त्यांवरून ही भव्य पदयात्रा काढण्यात आली. “जनतेचा आवाज – जनतेचा उमेदवार” अशा घोषणा देत कार्यकर्त्यांनी परिसर दुमदुमला होता. ठिकठिकाणी ग्रामस्थांनी फुलांची उधळण, टाळ्या आणि शिट्ट्यांच्या निनादात दोन्ही उमेदवारांचे जल्लोषात स्वागत केले. महिलांनी औक्षण करून उमेदवारांना विजयासाठी शुभेच्छा दिल्या. समस्या जाणून घेण्यावर भर – पदयात्रेदरम्यान उमेदवारांनी केवळ औपचारिकता न पाळता घराघरांत जाऊन नागरिकांशी थेट संवाद साधला. यावेळी ग्रामस्थांनी पाणीपुरवठा, रस्त्यांची दुरवस्था, ड्रेनेज लाईन, वीज, आरोग्य आणि स्वच्छतेबाबतच्या आपल्या व्यथा मांडल्या. विशेषतः महिला आणि युवकांच्या रोजगाराच्या व सुरक्षेच्या प्रश्नांवर चर्चा करण्यात आली. नागरिकांच्या सर्व समस्या ऐकून घेत, त्या प्राधान्याने सोडवण्याची ठाम ग्वाही दोन्ही उमेदवारांनी दिली. यावेळी अपक्ष उमेदवार पुनम विशाल विधाते म्हणाल्या, “सुतारवाडी ग्रामस्थांनी दाखवलेला विश्वास आणि प्रेम हीच आमची खरी ताकद आहे. केवळ आश्वासने न देता प्रत्यक्ष कामातून गावाचा कायापालट करण्याचा आमचा निर्धार आहे.” तर अपक्ष उमेदवार प्रमोद अण्णा निम्हण म्हणाले, “गावाचा सर्वांगीण विकास, मूलभूत सुविधांची पूर्तता आणि पारदर्शक कारभार हेच आमचे मुख्य उद्दिष्ट आहे. ग्रामस्थांच्या खंबीर साथीने सुतारवाडीला विकासाची नवी दिशा देऊ.” विजयाचा आत्मविश्वास दृढ – या पदयात्रेत महिला, युवक आणि ज्येष्ठ नागरिकांची उपस्थिती लक्षणीय होती. ग्रामस्थांच्या या उत्स्फूर्त पाठिंब्यामुळे ‘कपबशी’ आणि ‘शिट्टी’ या चिन्हांच्या प्रचाराला मोठी गती मिळाली आहे. या प्रतिसादामुळे दोन्ही उमेदवारांच्या गोटात उत्साहाचे वातावरण असून, विजयाचा आत्मविश्वास अधिकच दृढ झाला असल्याचे दिसून येत आहे.
