प्रभात वृत्तसेवा पुणे – भाजपचे निवडणूक प्रमुख गणेश बिडकर यांनी पुण्यात भाजपचा पहिला अर्ज दाखल केला. भाजपकडून उमेदवारी याद्या जाहीर न करता थेट उमेदवारांना एबी फाॅर्म देण्यात आले आहेत. त्यानंतर पक्षातील इतर उमेदवारांकडूनही अर्ज भरण्यास सुरुवात करण्यात आली आहे. भवानी पेठ क्षेत्रीय कार्यालयामध्ये प्रभाग क्र. २४ साठी गणेश बिडकर यांनी सोमवारी सकाळी राज्याचे उच्च व तंत्र शिक्षण मंत्री चंद्रकांत पाटील, आमदार हेमंत रासने यांच्यासमवेत आपला उमेदवारी अर्ज दाखल केला. या वेळी महापालिका निवडणुकीत महायुतीचे सर्व उमेदवार विजयी होतील, तसेच प्रभागातील सर्व उमेदवार मोठ्या मताधिक्याने विजयी होतील, असा ठाम विश्वास बिडकर यांनी अर्ज भरल्यानंतर पत्रकारांशी बोलताना व्यक्त केला. लोकसभा आणि विधानसभा निवडणुकीत पुणेकरांनी भाजपला भरभरून मतदान केले. त्यामुळे महापालिका निवडणुकीतही पुणेकर आमच्या मागे राहतील, जगातील सर्वात महत्त्वाचे शहर म्हणून पुणे जगाच्या नकाशावर यावे, असा आमचा प्रयत्न आहे. त्यासाठी गेल्या कार्यकाळात आम्ही अनेक मोठे प्रकल्प पूर्णत्वास नेले आहेत. येत्या कार्यकाळात पुण्याला आणखी पुढे न्यायचे असल्याचे बिडकर यांनी या वेळी बोलताना स्पष्ट केले.
