Modi – Trump meet :  जी-७ शिखर परिषदेदरम्यान तब्बल १६ महिन्यांनंतर पंतप्रधान नरेंद्र मोदी आणि अमेरिकेचे राष्ट्राध्यक्ष डोनाल्ड ट्रम्प यांची पहिली सार्वजनिक भेट झाली. दोन्ही नेत्यांनी हस्तांदोलन केले.

परिषदेच्या प्रारंभी यजमान फ्रान्स देशाचे राष्ट्राध्यक्ष इमॅन्युएल मॅक्रॉन यांनी पंतप्रधान मोदी यांचे विशेष स्वागत केले. त्यांनी मोदी यांना पुष्पगुच्छ दिला आणि दोन्ही नेत्यांमध्ये काही काळ अनौपचारिक संवादही झाला. त्यानंतर मोदी आणि ट्रम्प समोरासमोर आले आणि हस्तांदोलन करत एकमेकांची विचारपूस केली.

गेल्या १६ महिन्यांत दोन्ही नेत्यांची कोणतीही सार्वजनिक प्रत्यक्ष भेट झाली नव्हती. त्यामुळे ही भेट विशेष महत्त्वाची मानली जात आहे. भारत-अमेरिका संबंध, व्यापार, संरक्षण सहकार्य तसेच इंडो-पॅसिफिक क्षेत्रातील सामरिक भागीदारी या मुद्द्यांच्या पार्श्वभूमीवर या भेटीकडे विशेष लक्ष लागले आहे.

सूत्रांच्या माहितीनुसार, १७ जून रोजी मोदी आणि ट्रम्प यांच्यात स्वतंत्र द्विपक्षीय चर्चा होण्याची शक्यता आहे. या चर्चेत भारत-अमेरिका व्यापार संबंध अधिक बळकट करणे, संरक्षण क्षेत्रातील सहकार्य वाढविणे आणि क्वाड (QUAD) सहकार्य अधिक मजबूत करण्यावर भर दिला जाऊ शकतो.

आंतरराष्ट्रीय घडामोडींवर लक्ष ठेवणाऱ्या तज्ज्ञांच्या मते, सध्याच्या भू-राजकीय तणावाच्या पार्श्वभूमीवर मोदी-ट्रम्प यांची ही सकारात्मक भेट भारत-अमेरिका संबंधांना नवी चालना देण्याबरोबरच जी-७ सदस्य देशांमधील समन्वयालाही बळकटी देऊ शकते.

दरम्यान, या शिखर परिषदेत अमेरिका, ब्रिटन, जर्मनी, इटली, जपान, कॅनडा आणि फ्रान्ससह भारतासह अनेक प्रमुख देशांचे नेते सहभागी झाले आहेत. जागतिक अर्थव्यवस्था, हवामान बदल, कृत्रिम बुद्धिमत्ता (AI) नियमन, मध्य पूर्वेतील परिस्थिती आणि युक्रेन संकट हे परिषदेतील प्रमुख चर्चेचे विषय आहेत.