PM Modi Wealth: पंतप्रधान नरेंद्र मोदी यांनी मंगळवारी लोकसभा निवडणुकीसाठी वाराणसीतून तिसऱ्यांदा उमेदवारी अर्ज दाखल केला. निवडणूक प्रतिज्ञापत्रानुसार, पीएम मोदींनी त्यांची एकूण संपत्ती 3.02 कोटी रुपये असल्याचे जाहीर केले आहे. निवडणूक उमेदवारी अर्ज भरणाऱ्या प्रत्येक उमेदवाराला नियमानुसार त्यांच्या संपूर्ण मालमत्ता आणि दायित्वांचा हिशेब द्यावा लागतो. पंतप्रधानांच्या संपत्तीमध्ये गुंतवणुकीसह स्थावर आणि जंगम अशा दोन्ही मालमत्तांचा समावेश आहे.

पंतप्रधान नरेंद्र मोदी यांच्या प्रतिज्ञापत्रातून एक विशेष बाब समोर आली आहे ती म्हणजे त्यांचा बहुतांश पैसा मुदत ठेवींमध्ये आहे. आश्चर्याची बाब म्हणजे त्यांच्याकडे कोणतीही इक्विटी, कोणताही म्युच्युअल फंड आणि कोणतीही रिअल इस्टेट मालमत्ता नाही.

पीएम मोदींकडे चार सोन्याच्या अंगठ्या –

2019 मध्ये त्यांनी निवडणूक आयोगाला दिलेल्या प्रतिज्ञापत्रात एकूण 2.51 कोटी रुपयांची संपत्ती जाहीर केली होती. यापूर्वी 2014 मध्ये मोदींनी त्यांची एकूण संपत्ती 1.66 कोटी रुपये असल्याचे जाहीर केले होते.

2014 च्या तुलनेत 2019 मध्ये त्यांची संपत्ती सुमारे 85 लाख रुपयांनी वाढली. तर 2019 ते 2024 या पाच वर्षांत म्हणजेच त्यांच्या संपत्तीत 51 लाख रुपयांची वाढ झाली आहे.

पीएम मोदींकडे 2.67 लाख रुपये किमतीचे सोने असून ते चार अंगठ्याच्या रूपात ठेवण्यात आले आहे. याशिवाय त्यांनी नॅशनल सेव्हिंग सर्टिफिकेटमध्ये 9.12 लाख रुपयांची गुंतवणूक केली आहे. NSC मधील ही गुंतवणूक 2019 मध्ये 7.61 लाख रुपयांवरून सुमारे 2 लाख रुपयांपर्यंत वाढली आहे. शिवाय, 2024 च्या प्रतिज्ञापत्रानुसार, पंतप्रधानांकडे बँक मुदत ठेवींमध्ये (FD) 2.85 कोटी रुपये आहेत.

पंतप्रधान मोदींनी वाराणसीतून दाखल केला उमेदवारी अर्ज –

तत्पूर्वी, पंतप्रधान मोदींनी मंगळवारी वाराणसी येथे लोकसभा निवडणुकीसाठी भारतीय जनता पक्ष (भाजप) शासित राज्यांचे सुमारे अर्धा डझन मुख्यमंत्री, भाजप अध्यक्ष, अनेक केंद्रीय मंत्री आणि राष्ट्रीय लोकशाहीच्या विविध घटक पक्षांच्या नेत्यांच्या उपस्थितीत आघाडीकडून (एनडीए) उमेदवारी अर्ज दाखल केला. तिसऱ्या कार्यकाळात नव्या उर्जेने जनतेच्या हिताचे काम करणार असल्याचे त्यांनी सांगितले.

गंगा सप्तमीनिमित्त गंगा मातेला वंदन केल्यानंतर पंतप्रधान काशीच्या कोतवाल काल भैरवाच्या मंदिरात पोहोचले. तेथे पूजाअर्चा केल्यानंतर ते जिल्हा दंडाधिकारी कार्यालयात पोहोचले, तेथे त्यांनी विविध राजकीय नेत्यांसह ताकद दाखवत उमेदवारी अर्ज दाखल केला.

लोकसभा निवडणुकीत भाजपच्या दणदणीत विजयासाठी पंतप्रधानांनी सोमवारी काशी विश्वनाथ आणि मंगळवारी कालभैरव यांच्याकडून आशीर्वाद मागितले. मोदींनी 2014 मध्ये पहिल्यांदा आणि 2019 मध्ये दुसऱ्यांदा वाराणसी लोकसभा मतदारसंघात विजय मिळवला होता.