PM Modi In Mauritius | मॉरिशसचे पंतप्रधान नवीनचंद्र रामगुलाम यांनी पंतप्रधान नरेंद्र मोदी यांना त्यांचा देशाचा सर्वोच्च नागरी सन्मान ‘द ग्रँड कमांडर ऑफ द ऑर्डर ऑफ द स्टार अँड की ऑफ द इंडियन ओशन’ देण्याची करण्याची घोषणा केली. मॉरिशसचा सर्वोच्च सन्मान मिळवणारे पंतप्रधान मोदी पहिले भारतीय बनले आहेत. पोर्ट लुईस येथील भारतीय समुदायाच्या कार्यक्रमात रामगुलाम यांनी ही घोषणा केली.

पंतप्रधान मोदी सध्या दोन दिवसीय मॉरिशस दौऱ्यावर आहेत. या दरम्यान रामगुलाम यांनी हा पुरस्कार देण्याची घोषणा केली. देशाच्या सर्वोच्च पुरस्काराने सन्मानित केल्याबद्दल मोदींनी मॉरिशसच्या पंतप्रधानांचे आभार देखील मानले.

यावेळी पंतप्रधान नरेंद्र मोदी म्हणाले की, मॉरिशसच्या पंतप्रधानांनी नुकतेच जाहीर केले की, ते मला त्यांचा सर्वोच्च नागरी पुरस्काराने सन्मानित करणार आहेत. मी त्यांचा निर्णय नम्रतेने स्वीकारू इच्छितो. हा भारत आणि मॉरिशसच्या ऐतिहासिक संबंधांचा सन्मान आहे.

पंतप्रधान मोदी मॉरिशसच्या 57व्या राष्ट्रीय दिनाच्या समारंभात प्रमुख पाहुणे असतील. या समारंभात भारतीय नौदलाच्या युद्धनौकेसह भारतीय संरक्षण दलांची एक तुकडी सहभागी होणार आहे. पंतप्रधान मोदी भारताने निधी दिलेल्या 20 हून अधिक प्रकल्पांचे उद्घाटन देखील करणार आहेत. याशिवाय, लोकशाही मजबूत करण्याच्या उद्देशाने नवीन प्रमुख पायाभूत सुविधा प्रकल्पांची घोषणा देखील करतील.

पंतप्रधान मोदींनी या दौऱ्यावर मॉरिशसचे अध्यक्ष धरमबीर गोखूल यांची भेट घेतली. या वेळी त्यांनी मॉरिशसच्या राष्ट्रपतींना अनेक गोष्टी भेट म्हणून दिल्या आहेत, ज्यामध्ये महाकुंभातील संगमचे पाणी आणि सुपर फूड मखाना यांचा समावेश आहे. याशिवाय, पंतप्रधानांनी गोखूल यांच्या पत्नी वृंदा गोखूल यांना बनारसी सिल्क साडी भेट दिली.

दरम्यान, पंतप्रधान मोदी 10 वर्षांनी मॉरिशसच्या दौऱ्यावर आले आहेत. यापूर्वी त्यांनी मार्च 2015 मॉरिशसला भेट दिली होती. त्यावेळी पंतप्रधान मोदी राष्ट्रीय दिनाच्या समारंभात प्रमुख पाहुणे म्हणून उपस्थित होते.