Pradhan Mantri Kisan Samman Nidhi : देशातील गरीब शेतकऱ्यांसाठी  केंद्र सरकारकडून प्रधानमंत्री किसान सन्मान निधी योजनेची (Pradhan Mantri Kisan Samman Nidhi) सुरुवात करण्यात आली आहे. या योजनेच्या माध्यमातून देशातील गरीब शेतकऱ्यांना आर्थिक पाठबळ देणे हा उद्देश सरकारने डोळ्यासमोर ठेवला आहे. दरम्यान, आत्तापर्यंत देशातील शेतकऱ्यांना 15 हप्त्याचे वाटप करण्यात आले आहे. प्रत्येक चार महिन्याला दोन हजार रुपयांचा हप्ता शेतकऱ्यांच्या खात्यावर जमा होतो. असे वर्षभरात या योजनेच्या माध्यमातून शेतकऱ्यांना 6 हजार रुपये दिले जातात. दरम्यान, शेतकऱ्यांना 16 वा हफ्ता कधी मिळणार? याची माहिती आता समोर आली आहे.

केंद्रातील मोदी सरकार फेब्रुवारी 2024 ते मार्च 2024 दरम्यान प्रधानमंत्री किसान सन्मान निधी योजनेचा 16 वा हप्ता जारी करण्याची शक्यता  वर्तवण्यात येत आहे. मात्र, यासंदर्भात सरकारकडून कोणतीही अधिकृत घोषणा अद्याप करण्यात आलेली नाही. सरकारने 15 नोव्हेंबर 2023 रोजी योजनेचा 15 वा हप्ता जारी केला होता. पीएम-किसान योजनेअंतर्गत, सर्व जमीनधारक शेतकरी कुटुंबांना प्रत्येकी 2,000 रुपयांच्या तीन समान हप्त्यांमध्ये प्रतिवर्ष 6,000 रुपयांचा आर्थिक लाभ दिला जातो. पंतप्रधान नरेंद्र मोदी यांनी नोव्हेंबर महिन्यात 80 दशलक्षाहून अधिक शेतकऱ्यांना 18,000 कोटी रुपयांपेक्षा जास्त किमतीच्या योजनेचा 15 वा हप्ता जारी केला होता. यापूर्वी, सरकारने 14 हप्त्यांमध्ये शेतकऱ्यांना 2.62 लाख कोटी रुपयांहून अधिक रक्कम दिली आहे.

पीएम किसान ही केंद्र सरकारची योजना आहे. जी देशातील अल्पभूधारक शेतकऱ्यांच्या कुटुंबांना शेती आणि संबंधित कामांसाठी तसेच घरगुती गरजा पूर्ण करण्यासाठी मदत देण्यासाठी सुरू करण्यात आली आहे. सर्व जमीनधारक शेतकरी कुटुंबे, ज्यांच्या नावावर शेतीयोग्य जमीन आहे, ते योजनेअंतर्गत लाभ मिळवण्यास पात्र आहेत.

असा करा ऑनलाइन अर्ज ?
* अधिकृत वेबसाइट pmkisan.gov.in ला भेट द्या
*  नवीन शेतकरी नोंदणीवर क्लिक करा आणि आधार क्रमांक प्रविष्ट करा आणि कॅप्चा भरा
*  आता तुमचा संपूर्ण तपशील भरा आणि ‘होय’ वर क्लिक करा
*  पीएम किसान अर्ज फॉर्म 2023 मध्ये विचारलेली माहिती भरा, ती सबमिट करा आणि भविष्यातील संदर्भासाठी प्रिंट आउट घ्या.
*  पात्र शेतकरी त्यांची स्थिती याप्रमाणे तपासू शकतात
*  pmkisan.gov.in ला भेट द्या
*  मुख्यपृष्ठावरील ‘शेतकरी कॉर्नर’ विभागांतर्गत ‘लाभार्थी स्थिती’ पर्याय निवडा
*  नोंदणीकृत आधार क्रमांक किंवा बँक खाते क्रमांक प्रविष्ट करा
*  ‘डेटा मिळवा’ वर क्लिक करा
*  हप्त्याची स्थिती दिसेल.