HPV vaccination: गर्भाशयाच्या मुखाचा कर्करोग रोखण्यासाठी राज्य शासनाकडून 9 ते 14 वयोगटातील मुलींना एचपीव्ही (ह्यूमन पॅपिलोमा व्हायरस) प्रतिबंधात्मक लस देण्यात येत आहे. सातारा जिल्ह्यात मात्र हे लसीकरण संथ गतीने सुरु आहे. पालकांनी अफवांवर विश्वास न ठेवता तज्ज्ञांचा सल्ला घ्यावा, पात्र मुलींचे लसीकरण पूर्ण करून घ्यावे, असे आवाहन जिल्ह्यातील आरोग्य विभागाने केले आहे. आगामी शैक्षणिक सत्रात लसीकरणाचा वेग वाढवून निर्धारित उद्दिष्ट पूर्ण करण्यासाठी प्रशासन प्रयत्नशील असल्याचेही सांगण्यात आले.

जिल्ह्यात 19 हजार 492 मुर्लीच्या लसीकरणाचे उद्दिष्ट असताना आतापर्यंत केवळ 1 हजार 343 मुलींनाच एचपीव्ही लस देण्यात आल्याची माहिती जिल्हा परिषद आरोग्य अधिकारी महेश खलिपे यांनी दिली. जिल्ह्यातील शाळा आणि आरोग्य केंद्रांच्या माध्यमातून लसीकरण मोहीम सुरू करण्यात आली होती. मात्र, लसीच्या संभाव्य दुष्परिणामांबाबत समाज माध्यमांवर पसरलेल्या अपप्रचाराचा परिणाम पालकांच्या मनावर झाल्याने अनेकांनी आपल्या मुलींना लस देण्यास टाळाटाळ केली.

आरोग्य विभागाने वारंवार जनजागृती करूनही काही भागांत प्रतिसाद मर्यादित राहिला आहे. याशिवाय एप्रिल आणि मे महिन्यांत लागलेल्या उन्हाळी सुट्टीमुळे अनेक विद्यार्थिनी आपल्या मूळ गावी किंवा नातेवाइकांकडे गेल्याने शाळांमधून होणार्‍या लसीकरण मोहिमेवर परिणाम झाला. त्यामुळे लक्ष्याच्या तुलनेत लसीकरणाची टक्केवारी कमी राहिली आहे.
जिल्हा आरोग्य यंत्रणेकडून आता शाळा पुन्हा सुरू झाल्यानंतर विशेष मोहीम राबविण्याची तयारी सुरू आहे. अंगणवाडी सेविका, आशा स्वयंसेविका आणि आरोग्य कर्मचारी यांच्या माध्यमातून पालकांपर्यंत पोहोचून लसीबाबतचे गैरसमज दूर करण्यावर भर दिला जाणार आहे.

गर्भाशय मुखाच्या कर्करोगाचे वाढते प्रमाण महिलांच्या आरोग्यासमोरील गंभीर आव्हान ठरत असून, प्रतिबंधात्मक उपाययोजनांची गरज अधिक तीव्र झाली आहे. एचपीव्ही लस 2 गर्भाशयमुख कर्करोगाचा धोका लक्षणीयरीत्या कमी करण्यास मदत करते आणि ती सुरक्षित व प्रभावी आहे, असे त्यांनी सांगितले.

एचपीव्ही लसीबाबतच्या अफवा आणि गैरसमजांचा बाजार जोरात असल्याने लसीकरण मोहिमेला अपेक्षित प्रतिसाद मिळताना अडथळे निर्माण होत आहेत. जिल्ह्यात एचपीव्ही लसीकरणासाठी 530 शिबिरांचे आयोजन करण्यात आले असून, मोहिमेच्या यशस्वी अंमलबजावणीसाठी हजारो कर्मचारी कार्यरत आहेत. एचपीव्ही लसीकरणासाठी पात्र मुलींची नोंदणी यू- विन पोर्टलवर केली जात असून, ही मोफत लस शासकीय रुग्णालये, प्राथमिक आरोग्य केंद्रे आणि शाळांमधील विशेष शिबिरांमध्ये उपलब्ध करून दिली जात आहे.