हिंजवडी : आयटीनगरी हिंजवडी आणि आसपासचा परिसर समस्‍यांनी ग्रासला आहे. गेल्‍या एक वर्षापासून बैठका, सूचना आणि नियोजनाच्या फैऱ्या सुरू असून समस्‍या मात्र सुटल्‍या नाहीत. अखेर उपमुख्यमंत्री तथा पालकमंत्री अजित पवार यांनी हा विषय गांभिर्याने घेतला आहे. एका महिन्‍यात दोनदा हिंजवडीचा दौरा केला असून यावेळी मात्र अधिकाऱ्यांसह जे-जे उपाययोजनांना आडवे येत आहेत त्‍या सर्वांना फैलावर घेतले आणि उपाययोजना तातडीने सुरू करण्याचे कडक निर्देश दिले आहेत. पाहणी दौऱ्या दरम्‍यान अजित पवार यांनी सर्व अधिकाऱ्यांसोबत आणि लोकप्रतिनिधींसोबत घेतलेल्‍या बैठकीत पुढील पन्‍नास वर्षांचा विचार करुन दीर्घकालीन उपाययोजनांचे नियोजन करा, असे निर्देश अधिकाऱ्यांना दिले.

हिंजवडी आणि शहर परिसराला जोडणाऱ्या रस्त्यांची दुरुस्ती तसेच आवश्यकतेनुसार रस्ते रुंदीकरण करणे अपेक्षित आहे. यामुळे वाहतूक कोंडीतून नागरिकांना दिलासा मिळेल. त्याअनुषंगाने प्रशासकीय यंत्रणांनी समन्वयातून रस्ते रुंदीकरणासह दुरुस्ती करत नागरिकांच्या प्राथमिक गरजा पूर्ण होतील, त्या दृष्टीने तातडीने उपाययोजना करण्याचे निर्देश उपमुख्यमंत्री तथा पालकमंत्री अजित पवार यांनी दिले. पुणे महानगर प्रदेश विकास प्राधिकरणाच्या आकुर्डी येथील मुख्यालयात त्यांनी हिंजवडी परिसरातील वाहतूक कोंडीसंबंधी केलेल्या उपाययोजनांची पाहणीनंतर आढावा बैठक घेतली, यावेळी ते बोलत होते.

या बैठकीला विधानसभा उपाध्यक्ष अण्णा बनसोडे, आमदार शंकर मांडेकर, विभागीय आयुक्त डॉ. चंद्रकांत पुलकुंडवार, जिल्हाधिकारी जितेंद्र डुडी, पीएमआरडीएचे महानगर आयुक्त डॉ. योगेश म्हसे, अतिरिक्त महानगर आयुक्त दीपक सिंगला, पीसीएमसीचे आयुक्त शेखर सिंह, पीएमसीचे आयुक्त नवलकिशोर राम, जिल्हा परिषदेचे मुख्य कार्यकारी अधिकारी गजानन पाटील, पिंपरी चिंचवडचे पोलीस आयुक्त विनायक कुमार चौबे, सह पोलीस आयुक्त शशिकांत महावरकर यांच्यासह भारतीय राष्ट्रीय महामार्ग प्राधिकरण, सार्वजनिक बांधकाम विभाग, महाराष्ट्र औद्योगिक विकास महामंडळ, महाराष्ट्र प्रदूषण नियंत्रण मंडळ यांच्यासह विविध विभागाचे वरिष्ठ अधिकारी उपस्थित होते.

पाणीटंचाईसह इतर विकास कामांचा आढावा..

या बैठकीत पीएमआरडीएचे महानगर आयुक्त डॉ. योगेश म्हसे यांनी १३ जुलै रोजीच्या बैठकीच्या अनुषंगाने केलेल्या कार्यवाहीबाबत माहिती दिली. हिंजवडी आयटी पार्क परिसरात पीएमआरडीएमार्फत विकसित करण्यात येणारे रस्ते, पाणी आरक्षण आण‍ि भविष्य होणारी पाणीटंचाई, वाढते प्रदूषण यांचे निराकरण करण्यासाठी पीएमआर क्षेत्रासाठी पुढील ३० वर्षांची मागणी आणि संभाव्य तरतुदीचे विश्लेषण करणाऱ्या मास्‍टर प्लॅनचे सादरीकरण महानगर आयुक्त डॉ. म्हसे यांनी केले. यासह इंद्रायणी व पवना नदी प्रदूषण नियंत्रण प्रकल्प, प्राधिकरण क्षेत्रातील नागरी विकास केंद्र गावांमध्ये मल निस्सारण प्रकल्प आदींबाबत सादरीकरण करण्यात आले.

रस्‍ता रुंदीकरणासाठी भूसंपादन

हिंजवडीसह परिसरातील वाहतूक कोंडी सोडव‍िण्यासाठी पीएमआरडीएने प्रमुख रस्त्यांच्या रुंदीकरणासाठी भूसंपादन प्रक्रिया सुरू केली आहे. मार्सिडिज शोरूम ते म्हाळुंगे (MIDC Circle), सूर्या हॉस्पिटल ते साखरे वस्ती, सूर्या हॉस्पिटल ते ठाकर वस्ती ते माण गावठाण, म्हाळुंगे ते हिंजवडी फेज, नांदे ते माण, शनी मंदिर वाकड ते मारुंजी या रस्त्यांचे रुंदीकरण करण्यात येणार आहे.

पाहणी दौरा आणि ग्रामस्‍थांना आश्वासन

या बैठकीपूर्वी पुणे मेट्रो लाईन ३, स्थानक क्र. ६, क्रोमा, हिंजवडी, क्रोमा ते मेझानाईन ते लक्ष्मी चौक ते शिंदे वस्ती ते मारुंजी रोड, मारुंजी रोड – कासार साई (कॅनोल) विप्रो सर्कल फेज-२, विप्रो सर्कल फेज-२ – स्थानक क्र. ०३, डोहलर कंपनी, डोहलर कंपनी हिंजवडी फेज ३ माण गाव-पांडवनगर नगररचना रस्ता, नगररचना रस्ता ते प्राधिकरण आकुर्डी कार्यालयादरम्यान वाहतूक कोंडी सोडविण्याच्यादृष्टीने करण्यात येणाऱ्या उपाययोजना आणि सुरु असलेल्या विविध विकासकामाची पाहणी केली. यावेळी त्यांनी माण मारुंजी, हिंजवडीतील काही ग्रामस्थांशी संवाद साधून त्यांचे म्हणणे ऐकून घेतले. माण गावात गावपुढाऱ्यांनी केलेल्या काही मागण्या मान्य केल्या. यावेळी शेतकऱ्यांच्या जमिनीवर असलेले कासारसाई प्रकल्पाचे शिक्के काढून टाकण्याचे आश्वासन दिले. तर एमआयडीसीच्या चौथ्या टप्यातील भूसंपादनाचे शिक्के काढण्यासाठी सोमवारी मुंबईत चर्चा करतो, असे आश्वासन माणवासीयांना दिले.