पिंपरी – महापालिका निवडणुकीत पिंपरी-चिंचवडमध्ये भाजप-राष्ट्रवादी स्वतंत्र लढणार असल्याने महायुती, नंतर भाजप-सेनेची युती फिस्कटली. तर, दुसरीकडे दोन्ही राष्ट्रवादी एकत्र आल्यामुळे शहरात महाविकास आघाडी देखील तुटली आहे. त्यामुळे शिवेसना उध्दव ठाकरे गट व काँग्रेस पक्ष स्वतंत्र लढत आहेत. ठाकरे गटाने ५९, काँग्रेसने ६० आणि आम आदमी पक्षाने शहरात ३५ जागांवर उमेदवार रिंगणात उतरविले आहेत. महापालिका निवडणुकीला महायुती व महाविकास आघाडी एकत्रितपणे सामोरे जाईल, असे चित्र निवडणूक जाहीर होण्यापूर्वी होते. त्या त्या पक्षातील प्रमुख पदाधिकाऱ्यांच्या बैठका आणि चर्चेच्या फेऱ्या सुरू होत्या. परंतु, पिंपरी-चिंचवड महापालिकेच्या निवडणुकीत भाजपने सुरुवातीला स्वबळाचा नारा दिला. तर राष्ट्रवादीचे दोन्ही गट एकत्र येण्याची चर्चा सुरू झाली. त्यामुळे शहरात महाविकास आघाडीचे समीकरण बिघडले. शिवसेना, मनसे आणि काँग्रेस एकत्र लढणार होते. अखेरच्या क्षणी काही जागांवरून त्यांचेही एकमत न झाल्याने सर्वांनी स्वतंत्र लढण्याचा निर्णय घेतला. शिवसेना ठाकरे गट, मनसे आणि राष्ट्रीय समाज पक्ष य़ांची युती झाली. ठाकरे गटाने ५९ जागांवर उमेदवार दिले आहेत. शिवसेना ठाकरे गटाने उमेदवार दिलेल्या जागा वगळून मनसेने १७ जागांवर उमेदवार दिले. तर, रासप तीन जागांवर निवडणूक लढत आहे. त्यापाठोपाठ काँग्रेसने ६० जागांवर उमेदवार उतरविले आहेत. शहराध्यक्ष कैलास कदम यांनी निवडणुकीच्या धामधुमीत राजीनामा दिला. त्यामुळे थेट प्रदेशाध्यक्ष हर्षवर्धन सपकाळ यांच्याकडून उमेदवारांना एबी फॉर्म देण्यात आल्याचे काँग्रेस पदाधिकाऱ्यांनी सांगितले. तर, पहिल्यांदाच पिंपरी-चिंचवड महापालिकेच्या निवडणुकीत आम आदमी पक्षाने देखील आपले उमेदवार दिले आहेत. आम आदमी पक्षाने ३५ जागांवर अधिकृत उमेदवार उतरविले आहेत. दरम्यान, भाजप, दोन्ही राष्ट्रवादी आणि एकनाथ शिंदे यांच्या शिवसेनेपाठोपाठ शिवसेना ठाकरे गट, काँग्रेस, आप, मनसे हे पक्ष पालिका निवडणुकीच्या रिंगणात आहेत.
