पिंपरी – पिंपरी चिंचवड महापालिकेच्या सार्वत्रिक निवडणुकीसाठी भाजप व शिवसेनेच्या युतीसंदर्भात सोमवार (दि. २९) पर्यंत चर्चेच्या फेऱ्या सुरू होत्या. मात्र, जागा वाटपावरून एकमत न झाल्याने युतीची बोलणी फिस्कटली. तर अखेरच्या क्षणापर्यंत भाजपाने शिवसेनेला बैठकांमध्ये गुंतवत ठेवले होते. परिणामी, पक्षातील इच्छुकांनी अर्ज देखील दाखल केले नाही. मंगळवारी (दि. ३०) सकाळी खासदार श्रीरंग बारणे यांनी युती होणार नसून महापालिका स्वबळावर लढण्याची घोषणा केली. महापालिका निवडणुकीसाठी भाजप, शिवसेना (एकनाथ शिंदे) आणि आरपीआय हे तीन पक्ष महायुतीमध्ये एकत्रित लढण्याबाबत बोलणी सुरू होती. शिवसेनेने भाजपकडे ३२ जागांची मागणी केली होती. प्रभागानुसार एक याप्रमाणे शिवसेनेने गणित मांडले होते. मात्र, त्याला भाजपाने विरोध केला. त्यानंतर शिवसेना १५ जागांवर लढण्यास तयार झाली. त्यानंतर भाजपाने १४ जागा देण्याचे मान्य केले. याबाबत अर्ज दाखल करण्याच्या शेवटच्या मुदतीपर्यंत चर्चा सुरू राहिली. अखेर प्रभाग क्रमांक २३ आणि २४ येथील जागांवरून पेच निर्माण झाला. खासदार बारणे यांनी पुत्र विश्वजीत बारणे आणि पुतणे निलेश बारणे यांना प्रभाग २३ मधून उमेदवारी देण्याची मागणी केली होती. मात्र, कोणालाही एकालाच जागा देण्यावरून भाजपा अडून बसली होती. परिणामी, चर्चेच्या फेऱ्या वाया जाऊन अखेर पिंपरी चिंचवड शहरात युती तुटली. दरम्यान, सुरूवातीला अजित पवार यांच्या राष्ट्रवादीसोबत युती करण्याच्या हालचाली सुरू होत्या. याबाबत उपमुख्यमंत्री एकनाथ शिंदे यांनी देखील युती करण्याबाबत हिरवा कंदील दिला होता. राष्ट्रवादीने शिवसेनेला २५ जागांची ऑफर दिली होती. मात्र, त्यावर चर्चा सुरू असतानाच भाजपाने पांरपारिक युतीमध्ये राहण्याचा सल्ला देत युती करण्याच्या हालचाली सुरू केल्या. त्यानंतर दोन्हीही राष्ट्रवादी एकत्र येत आघाडी झाली. तर अंतिमक्षणी भाजप शिवसेना युती फिस्कटल्याने शिवसेनेला राष्ट्रवादी काँग्रेसचे दरवाजे देखील बंद झाले. ‘२०१७ च्या महापालिकेला देखील अशाच पद्धतीने चर्चा सुरू होती. मात्र, त्यावेळी देखील शिवसेनेने स्वबळावर निवडणूक लढवली होती. पक्षासाठी शहरातील अनेक कार्यकर्ते काम करत असतात. त्यांना निवडणूक लढायची असते. पक्षातील कार्यकर्त्यांना न्याय मिळाला पाहिजे. महापालिका निवडणूक शिवसेना स्वबळावर लढणार आहे.’- श्रीरंग बारणे, खासदार, शिवसेना.
