पिंपरी :  माढा लोकसभा मतदार संघाचे खासदार धैर्यशील मोहिते -पाटील यांनी केंद्रीय रेल्वेमंत्री अश्विनी वैष्णव यांची भेट घेतली व महाराष्ट्रातील दोन प्रमुख तीर्थक्षेत्रे असलेली देहू आणि पंढरपूर रेल्वेमार्गावर रेल्वेसेवा सुरू करण्याची मागणी केली. महाराष्ट्रभरातील लाखो वारकरी भक्तांसाठी पंढरपूर देहू रेल्वे सुविधायुक्त ठरेल, असे या निवेदनात नमूद केले आहे.

पंढरपूर येथील श्री विठ्ठल रुक्मिणी मंदिर, देहू येथील संत तुकाराम महाराजांचे जन्मस्थान, तसेच आळंदीतील संत ज्ञानेश्वर महाराजांची समाधी राज्यभरातील लाखो भक्तांचे प्रमुख तीर्थस्थळे आहेत. सद्यस्थितीत देहू आणि पंढरपूर दरम्यान रेल्वे सेवा उपलब्ध नसल्यामुळे भाविक भक्त व प्रवाशांना अडचणी येत आहेत. दादर-पंढरपूर सांगोला-मिरजमार्गे सातारा ही एक्सप्रेस आठवड्यातून तीन दिवस चालते.

प्रवाशांच्या सोईकरता ही रेल्वे दररोज नियमित करण्यात यावी.कुर्डुवाडी जंक्शनवर पुणे-सिकंदराबाद शताब्दी एक्सप्रेसला थांब्याची मागणी केली आहे. तर हुतात्मा व उद्यान एक्स्प्रेसला माढा व जेऊर येथे थांबा देण्याची मागणी केली आहे. मुंबई-हैदराबाद एक्स्प्रस ही करोना काळानंतर संपूर्णपणे एसी कोचमध्ये रूपांतरित करण्यात आली आहे.

सध्या या गाडीत 2 स्लीपर कोच आणि 2 जनरल कोच उपलब्ध आहेत. मुंबई ते हैदराबाद दरम्यानच्या अन्य स्थानकांवरून प्रवास करणार्‍या सर्वसामान्य प्रवाशांना कोचच्या कमतरतेमुळे मोठ्या अडचणींचा सामना करावा लागत आहे. त्यामुळे, या गाडीमध्ये अतिरिक्त 2 स्लीपर आणि 2 जनरल कोच जोडण्याची मागणी केली आहे.