Pimpari News : शासकीय तंत्रनिकेतन सोलापूर यांच्या वतीने तळेगाव येथे आयोजित करण्यात आलेल्या पुरस्कार प्रदान सोहळ्यात औद्योगिक सुरक्षा आणि आरोग्य संचालनालयाच्या अपर संचालक शारदा होंदुले यांचा सत्कार करण्यात आला. औद्योगिक क्षेत्रातील कामगारांची सुरक्षा, आरोग्य आणि सुरक्षित कार्यपरिसर निर्माण करण्यासाठी दिलेल्या उल्लेखनीय योगदानाबद्दल त्यांना पुरस्कार देण्यात आला. यावेळी विविध मान्यवरांनी आपल्या मनोगतातून शारदा होंदुले यांच्या कार्याचा गौरव केला. औद्योगिक सुरक्षा क्षेत्रात त्यांनी केलेल्या कार्यामुळे अनेक उद्योगांमध्ये सुरक्षितता आणि शिस्त निर्माण होण्यास मदत झाल्याचे नमूद केले. सत्कार समारंभात शारदा होंदुले यांच्या शैक्षणिक व प्रशासकीय कारकिर्दीचा आढावा घेण्यात आला. मेकॅनिकल इंजिनिअरिंगमधील डिप्लोमा, बी.ई. तसेच अॅडव्हान्स डिप्लोमा इन इंडस्ट्रियल सेफ्टीचे शिक्षण पूर्ण केल्यानंतर त्यांनी पदोन्नती मिळवत पुणे प्रशासकीय विभागाची जबाबदारी त्यांनी यशस्वीपणे सांभाळली आहे. गंभीर औद्योगिक अपघातांची चौकशी, प्रतिबंधात्मक उपाययोजना आणि त्यांच्या काटेकोर अंमलबजावणीमुळे औद्योगिक क्षेत्र अधिक सुरक्षित आणि जबाबदार बनण्यास त्यांच्या कार्याचा मोठा हातभार लागल्याचे यावेळी सांगण्यात आले. सत्काराला उत्तर देताना शारदा होंदुले यांनी मिळालेल्या सन्मानाबद्दल कृतज्ञता व्यक्त केली. प्रमुख पाहुणे डॉ. अरविंद देशपांडे यांनीही आपल्या भाषणातून त्यांच्या कार्याचे कौतुक केले.तसेच माजी विद्यार्थ्यांनी तंत्रनिकेतनमध्ये जाऊन मार्गदर्शन करण्याचे आवाहन केले . यावेळी शासकीय तंत्रनिकेतन सोलापूरचे प्राचार्य डॉ. नरोटे, सिंहगड इन्स्टिट्यूट ऑफ टेक्नॉलॉजी अँड सायन्सचे सीईओ व व्यवस्थापकीय संचालक डॉ. अरविंद देशपांडे, प्रा. कदम, प्रा. सय्यद, नंदकुमार शेलार , तंत्रनिकेतनचे माजी विद्यार्थी , राजेंद्र पवार , विलास बाबर , लतीफ सय्यद , रवींद्र चव्हाण, शशिकांत हळदे आदी मान्यवर कार्यक्रमाचे सूत्रसंचालन डॉ. विनया केसकर यांनी केले. आभार मनोज गायकवाड मानले. उत्साहाच्या वातावरणात हा सोहळा पार पडला.
