पिंपरी (प्रतिनिधी) – पिंपरी-चिंचवड महापालिका हद्दीतील थकीत मिळकत करापोटी महापालिकेच्या करसंकलन विभागाच्या वतीने शहराच्या विविध भागांमधील 13 मिळकती लिलावात काढल्या आहेत. यामध्ये 7 निवासी तर 6 बिगरनिवासी मिळकतींचा समावेश आहे.

या प्रत्येक मिळकतीचे मूल्यांकन करून अपेक्षित रक्कम मिळकतीसमोर नमूद करण्यात आली असून, या लिलाव बोलीत सहभागी होणार्‍या इच्छूकांना मिळकतीच्या मूल्यांकनाच्या एक टक्के बयाना रकमेचा डीडी महापालिका मुख्यालयातील करसंकलन विभागात 27 मार्चपर्यंत जमा करावयाचा आहे.

वर्षानुवर्षे मिळकतकर थकबाकी ठेवणार्‍या नागरिकांवर कठोर कारवाई करण्याचा निर्णय महापालिका प्रशासनाने घेतला आहे. त्याअंतर्गत विविध योजना, धोरणे, निर्णय घेऊन अधिकाधिक थकबाकी वसुलीचा प्रयत्न केला जात आहे. पूर्वसूचना देणे, जप्ती करणे, प्रसंगी जप्त मालमत्तांचा लिलाव करणे, असे नियोजन केले आहे.

मिळकतकर वसुलीसाठी एसएमएस व कॉलिंगद्वारे आवाहन केले जात आहे. त्यानंतरही थकबाकी न भरल्यास जप्तीची कारवाई केली जाणार आहे. गेल्या जप्त केलेल्या मालमत्तांचा लिलाव केला जाणार आहे. वर्षानुवर्षे थकीत कर वसुलीसाठी महापालिका करसंकलन व करआकारणी विभाग प्रयत्न करीत आहे.

या वर्षी एक हजार कोटी रुपये मिळकतकर वसुलीचे उद्दिष्ट ठेवले आहे. त्यासाठी सिद्धी प्रकल्पाअंतर्गत शंभर टक्के मिळकतकर बिलांचे वाटप घरोघरी केले आहे. त्याअंतर्गत एक लाखांपेक्षा जास्त थकबाकीदारांना, 22 हजार मिळकतधारकांना जप्ती पूर्व नोटीस दिल्या जात आहेत. हे करूनही थकबाकी भरण्यास टाळाटाळ करणाऱ्या थकबाकीदार मिळकतधारकांची नावे करसंकलन विभागाच्या वतीने वर्तमनपत्रात प्रसिद्ध केली जात आहेत.

पाणीपट्टी वसुलीसाठी मोहीम तीव्र
पाणीपट्टी वसुलीचे नियोजनदेखील करसंकलन विभागाच्या वतीने केले जात आहे. थकबाकीदार नागरिक व सोसायट्यांना नोटीस पाठवून संबंधित थकबाकीदारांचा पाणीपुरवठा खंडित केला जात आहे. महापालिकेच्या कर्मचार्‍यांनी आता पाणीपट्टी वसुलीकडे आपला मोर्चा वळविला आहे. ही कारवाई करताना सोबत न्यायालयाच्या आदेशाची प्रत देखील दिली जात आहे.

कटू कारवाई टाळण्यासाठी कर भरा
शहरात पुरविल्या जाणार्‍या विविध नागरी सुविधांकरिता केला जाणारा खर्च महापालिकेच्या तिजोरीतून केला जातो. मात्र. भरणा कमी असल्यास त्याचा थेट परिणाम शहरातील विकासकामांवर पडत असतो. त्यामुळे प्रत्येक नागरिकाने आपली जबाबदारी ओळखून मालमत्ता कर व पाणीपट्टी वेळेवर जमा करून आपले कर्तव्य पार पाडावे. -नीलेश देशमुख सहाय्यक आयुक्त करसंकलन वभागा, पिं.चिं. मनपा