प्रभात वृत्तसेवा पिंपरी – जयहिंद बॅकेचे संचालक अजिंक्य विनोदे यांच्यावर हल्ला करणा-या तिपाले टोळीवर लवकरच मोकाची कारवाई करण्यात येणार आहे. याबाबतचा प्रस्ताव वरिष्ठांकडे पाठविण्यात आल्याची माहिती हिंजवडी पोलीस ठाण्याचे वरिष्ठ निरीक्षक बालाजी पांढरे यांनी दिली आहे.हॉटेलचे थकीत भाडे मागितल्याच्या कारणावरून अजिंक्य धनाजी विनोदे (वय २८, रा. विनोदे वस्ती, वाकड) यांच्यावर टोळक्याने केलेल्या हल्ल्यात ते गंभीर जखमी झाले. बेलबॉटम हॉटेलचा मॅनेजर सुमित भिकनराव संदानशिव (रा. बिजलीनगर, चिंचवड), विकी ऊर्फ प्रथमेश लालासाहेब तिपाले (रा. बिजलीनगर, चिंचवड), अथर्व महेश शिंदे (रा. कात्रज, पुणे), गौतम परशुराम कांबळे (रा. चिंचवड), बंटी शांताराम ठाकरे (रा. मोहननगर, चिंचवड) आणि समाधान यांच्यावर गुन्हा दाखल करत पोलिसांनी त्याला अटक केली.सराईत गुन्हेगार आरोपी विकी तिपाले याला पोलीस उपायुक्त परिमंडळ एक यांनी १० ऑगस्ट २०२४ रोजी दोन वर्षांकरिता तडीपार केले आहे. मात्र तडीपारीची मुदत पूर्ण होण्याआधीत तो शहरात वास्तव्य करीत असल्याचे या घटनेतून दिसून आले आहे. आरोपी तिपाले हा सराईत गुन्हेगार असून तो टोळी चालवत असल्याचेही या गुन्ह्याच्या तपासामधून निष्पन्न झाले आहे.आरोपी तिपाले यांच्यावर चिंचवड पोलीस ठाण्यात २०१९ मध्ये दंगल करणे, बेकायदेशीर हत्यार बाळगणे आदी कलमांखाली गुन्हा दाखल आहे. तर २०२३ मध्ये बेकायदेशीररित्या शस्त्र बाळगल्याचा गुन्हा दाखल आहे. त्यानंतर २०२४ मध्ये हिंजवडी पोलीस ठाण्यात त्याच्यावर मारहाण करण्याचा गुन्हा दाखल आहे. याच वर्षी त्याच्यावर चिंचवड पोलीस ठाण्यात महाराष्ट्र पोलीस कायद्यान्वे गुन्हा दाखल आहे. याशिवाय आरोपी अथर्व महेश शिंदे आणि गौतम परशुराम कांबळे या दोघांच्या विरोधात २०१९मध्ये मारहाण करून लुटमार करणे आणि खून करणे आदी कलमांखाली गुन्हा दाखल आहे. तिपाले याच्यावर चिंचवड पोलिसांनी ३१ जानेवरी २०२३ रोजी प्रतिबंधात्मक कारवाई केली आहे. तसेच त्याला १० ऑगस्ट २०२४ पासून दोन वर्षांकरिता पुणे जिल्ह्यातून तडीपार केले आहे. मात्र तडीपारीच्या आदेशाचा भंग करीत होता शहरात वावरत होता. “तिपाले टोळीने काही गुन्हे स्वतःच्या आर्थिक फायद्यासाठी एकत्रितरित्या केले आहेत. आरोपींची गुन्हेगारी पाश्र्वभूमी पाहता त्यांच्यावर मोकाची कारवाई करण्याचा प्रस्ताव वरिष्ठांकडे पाठविण्यात आला आहे.” – बालाजी पांढरे, वरिष्ठ पोलीस निरीक्षक, हिंजवडी पोलीस ठाणे
