Pimpri Chinchwad RTO – मोटार वाहन कर थकविणाऱ्या वाहनधारकांवर प्रादेशिक परिवहन विभागाने कारवाईचा बडगा उगारला आहे. नियमभंग आणि थकीत करामुळे जप्त करण्यात आलेली तब्बल ९३ वाहने आता ऑनलाइन इ-लिलावातून विक्रीस काढण्यात येणार आहेत. हा इ-लिलाव १० जून २०२६ रोजी दुपारी १२ ते सायंकाळी ४ या वेळेत पार पडणार आहे. विशेष म्हणजे, ही सर्व वाहने ‘भंगार’ स्वरूपात विक्रीस ठेवण्यात आली आहेत. त्यामुळे केवळ सरकारमान्य वाहन स्क्रॅपिंग संस्था (RVSF) यांनाच लिलावात सहभागी होता येणार आहे. प्रादेशिक परिवहन कार्यालयाच्या वायुवेग पथकाने मागील काही महिन्यांत ही वाहने जप्त केली होती. कर न भरणे, नियमांचे उल्लंघन करणे आणि वारंवार नोटीस देऊनही प्रतिसाद न देणे यामुळे ही कारवाई करण्यात आली होती. वाहनमालकांसाठी अंतिम इशारा जप्त वाहनांच्या मालकांना परिवहन विभागाने शेवटची संधी दिली आहे. लिलावापूर्वी थकीत कर भरून किंवा आवश्यक कागदपत्रे सादर करून संबंधितांनी आपली वाहने सोडवून घ्यावीत, असे आवाहन करण्यात आले आहे. वाहनावर दावा करणाऱ्या चालक, मालक किंवा वित्तदात्यांनी मुदतीपूर्वी कार्यालयाशी संपर्क साधणे आवश्यक आहे. अन्यथा लिलावानंतर कोणतीही हरकत ग्राह्य धरली जाणार नसल्याचे प्रशासनाने स्पष्ट केले आहे. वाहनांची प्रत्यक्ष पाहणी सुरू लिलावात समाविष्ट वाहनांची पाहणी करण्याची सुविधाही उपलब्ध करण्यात आली आहे. पिंपरी-चिंचवड RTO कार्यालय परिसर, राजगुरूनगर बस डेपो आणि मंचर बस डेपो येथे कार्यालयीन वेळेत वाहने पाहता येणार आहेत. तसेच जप्त वाहनांची संपूर्ण यादी RTO कार्यालयाच्या सूचना फलकावर प्रसिद्ध करण्यात आली आहे. आरटीओकडे विशेष अधिकार राखीव लिलाव प्रक्रिया रद्द करणे, तहकूब ठेवणे किंवा त्यामध्ये बदल करण्याचा अधिकार उप प्रादेशिक परिवहन अधिकारी तथा कराधान प्राधिकाऱ्यांकडे राखीव ठेवण्यात आला आहे. दरम्यान, थकीत करामुळे वाहने जप्त होण्याच्या कारवायांमध्ये वाढ होत असल्याने वाहनधारकांनी वेळेत कर भरण्याचे आवाहन परिवहन विभागाने केले आहे.
