Pimpri Chinchwad : पिंपरी चिंचवड महापालिकेची आर्थिक स्थिती वाईट असल्याचे अंदाजपत्रकावरून समोर आले आहे. त्यामुळे महापालिकेच्या तिजोरीत महसूलाचा भरणा करण्यासाठी महापालिकेने प्रयत्न सुरू केले आहेत. त्याचाच एक भाग म्हणून शहरातील अनधिकृत जाहिरातींना चाप लावून जाहिरातदारांकडून महसूल वसूल केला जाणार आहे. त्यासाठी महापालिकेच्या आकाश चिन्ह व परवाना विभागामार्फत या कमानी, उड्डाणपूल यावर जाहिरात करण्यासाठी निविदाप्रक्रिया राबविण्यात आली आहे. ती पूर्ण झाली असून पुढील आठवड्यात स्थायी समितीसमोर मंजुरीसाठी ठेवण्यात येणार आहे. शहरातील रस्त्यांवरील जाहिरात कमानी (गॅन्ट्री) आणि विजेच्या खांबवरील क्युऑक्स नियमानुसार लावण्यास परवानगी देऊन त्यातून पालिकेला उत्पन्न मिळते. परंतु, प्रशासकीय राजवटीत याकडे पूर्णपणे दुर्लक्ष झाले. चार वर्षात या जाहिरातींसाठी कोणतीही निविदाप्रक्रिया राबविली गेली नाही. कमानी व विजेच्या खांबवरील क्युऑक्सवर शहरभर सर्रास अनधिकृत जाहिराती आजअखेरपर्यंत सुरू आहेत. दरम्यान, प्रशासनाने निविदाप्रक्रियेव्दारे अधिकचे उत्पन्न देणाऱ्या संस्थांना जाहिराती लावण्याचे अधिकार देण्याची प्रक्रिया राबविली. त्यानुसार सर्व रस्त्यांवरील दिशादर्शक फलकांवरील जाहिराती, विजेच्या खांबवरील क्युऑक्स आणि मुख्य रस्त्यांवरील कमानी यासाठी जाहिरदारांकडून दर मागविण्यात आले होते. त्यामध्ये सर्वाधिक उत्पन्न देणाऱ्या तीन एजन्सी निश्चित झाल्या आहेत. शहरात वाहतूक कोंडीपासून सुटका होण्यासासाठी अनेक मोठ मोठे उड्डाणपूल वग्रे डसेपरेटर उभारण्यात आले आहेत. शहरात तीन मुख्य रस्त्यांवरील या उड्डाणपूल व ग्रेडसेपरेटरवर जाहिराती लावण्यास परवानगी दिल्यामुळेही पालिकेला ७४ कोटी ७४लाख इतका महसूल मिळणार आहे. यामध्ये जुना पुणे-मुंबई महामार्गावर दहा वर्षात ३९ कोटी ७ लाख, औध-रावेत रस्त्यावर २४ कोटी ६५ लाख आणि मुंबई-बैगलोर महामार्गावर ११ कोटी १ लाख उत्पन्न मिळणार आहे. वर्षाकाठी दीडशे कोटींचे उत्पन्न वर्षाकाठी सर्व रस्त्यांवरील दिशादर्शक फलकांवरील जाहिरातींमधून २ कोटी ९१, विजेच्या खांबवरील क्युऑक्सव्दारे ११ कोटी ३९ लाख आणि मुख्य रस्त्यांवरील कमानीवरील जाहिरातींपासून ७ कोटी ४७ लाख रुपये असे उत्पन्न मिळणार आहे. तर, पाच वर्षात दिशादर्शक फलक व क्युऑक्सव्दारे ७१ कोटी ५४ लाख मिळणार आहे. यामध्ये क्युऑक्स लावण्यासाठी सर्वाधिक २५ कोटी २० लाख रुपये उत्पन्न ड क्षेत्रीय कार्यालयाच्या हद्दीसाठी मिळणार आहे. तर, सर्वात कमी फ क्षेत्री कार्यालयासाठी ५ कोटी ६ लाख रुपये उत्पन्न मिळेल. या सगळ्यातून पालिका तिजोरीत एकूण १४६ कोटी रुपये जमा होतील, असा प्रशासनाचा दावा आहे. पाच वर्षात मोठे आर्थिक नुकसान महापालिकेच्या आकाशचिन्ह व परवाना विभागाकडून यापूर्वी निविदा काढून क्युऑक्सवर जाहिरातींसाठी एजन्सींची नियुक्ती केली होती. परंतु, त्या निविदेची मुदत ३० नोव्हेंबर २०२१ रोजी संपुष्टात आली. त्या नंतर या विभागामार्फत कोणतीही निविदाप्रक्रिया राबविली गेली नाही. केवळ निविदा न काढल्यामुळे महापालिकेचे मोठे आर्थिक नुकसान झाले. ‘विभागाच्या वतीने निविदा प्रक्रिया पूर्ण करण्यात आली आहे. पुढील आठवड्यात हा विषय मंजुरीसाठी स्थायी समितीसमोर ठेवण्यात येईल. त्याला स्थायीची मान्यता मिळाल्यानंतर कामाचा आदेश देण्यात येईल. या माध्यमातून महापालिकेच्या तिजोरीत भर पडणार आहे.’- राजेश आगळे, उपायुक्त, आकाशचिन्ह व परवाना विभाग.
