पिंपरी (प्रकाश यादव ) -एकीकडे राज्यातील अनेक उद्योग गुजरातला जात असतानाच आता गुजरात विधानसभा निवडणुकीचा पिंपरी-चिंचवडवासियांनाही फटका बसला आहे. शहरवासियांच्या दृष्टीने महत्वाचा असणारा पाणी प्रश्‍न सोडविण्यासाठी चिखली जलशुध्दीकरण केंद्राचे काम पूर्ण झाले असून याचे उद्‌घाटन लवकर होणे अपेक्षित होते. मात्र, या प्रकल्पाचे उद्‌घाटन रेंगाळले आहे. त्याचबरोबर तारांगण प्रकल्प, निगडी प्राधिकरणातील गदिमा नाट्यगृह, शहरातील विविध चौकातील शिल्पांचे उपमुख्यमंत्री तथा गृहमंत्री देवेंद्र फडणवीस यांच्या हस्ते करण्याचे नियोजन होते. मात्र, फडणवीस हे गुजरात विधानसभा निवडणुकीसाठी स्टार प्रचारक आहेत. त्यामुळे फडणवीस यांना 5 डिसेंबरपर्यंत वेळ नसल्याने शहरातील विकास कामांच्या उद्‌घाटनांना ब्रेक लागल्याची चर्चा राजकीय वतुर्ळात जोरदार रंगली आहे.
पिंपरी-चिंचवड शहराला गेल्या तीन वर्षांपासून एक दिवसाआड पाणी पुरवठा सुरू आहे. शहराला मावळातील पवना धरणातून 510 एमएलडी पाणी मिळते. हे पाणी महापालिका पवना नदीवरील रावेत बंधाऱ्यावरून उचलते. मात्र, शहराच्या वाढत्या लोकसंख्येमुळे पाण्याची मागणीही वाढली आहे. त्यामुळेच शहरातील विविध भागातील रहिवाशांना पाणी समस्येला तोंड द्यावे लागत आहे. यावर उपाय योजना म्हणून महापालिकेने भामा-आसखेड धरणातून 167 तर आंद्रा धरणातून 100 असे 267 एमएलडी पाणी आणण्याचे नियोजन केले आहे.
पहिल्या टप्प्यात आंद्रा धरणाचे पाणी शहराला मिळणार आहे. हे पाणी मिळण्यासाठी सर्व कामकाज पूर्ण झाले आहे. त्यादृष्टीने चिखलीत उभारण्यात आलेल्या जलशुध्दीकरण केंद्राच्या उद्‌घाटनासह बहुचर्चित तारागंण प्रकल्प, निगडी प्राधिकरणातील गदिमा नाट्यगृह, शहरातील विविध चौकातील शिल्प, मोशी अग्निशमन केंद्र, इंद्रायणीनगर उद्यान व विरंगुळा केंद्राचे उद्‌घाटन आणि अमृत प्रकल्पातील एसटीपी, जिजाऊ क्‍लिनिकचे
भूमिपूजनासाठी शहर भाजपच्या नेत्यांनी उपमुख्यमंत्री फडणवीस यांच्याकडे वेळ मागितली होती. फडणवीस यांच्या कार्यालयाकडून उद्‌घाटन आणि भूमिपूजन होणाऱ्या कामाची यादी दि. 24 नोव्हेंबर रोजी तत्काळ मागविली होती. त्यानुसार या कामांची उद्‌घाटने आणि भूमीपूजने आज सोमवार (दि.28) रोजी उपमुख्यमंत्री फडणवीस यांच्या हस्ते नियोजन केले होते. त्यादृष्टीने नियोजन करण्यासाठी महापालिकेत सर्व विभाग प्रमुखांची बैठकही पार पडली होती. मात्र, सोमवारची वेळ देण्यात आलेली नाही. गुजरात निवडणुकीचा प्रचार पूर्ण झाल्यानंतरच पिंपरी-चिंचवडमधील विकासकामांच्या उद्‌घाटनाला वेळ मिळणार असल्याचे सांगण्यात येत आहे.
उपमुख्यमंत्री फडणवीस गुजरात निवडणुकीत व्यस्त
गुजरातमध्ये विधानसभा निवडणुकीचा रणसंग्राम सुरू असून दि. 1 आणि दि. 5 डिसेंबर रोजी मतदान होणार आहे. या निवडणुकीसाठी उपमुख्यमंत्री देवेंद्र फडणवीस स्टार प्रचारक आहेत. त्यामुळे फडणवीस यांना 5 डिसेंबरपर्यंत वेळ नसल्यानेच उद्‌घाटने आणि भूमिपूजनांच्या कार्यक्रमाला ब्रेक लागल्याची चर्चा शहरातील राजकीय वतुर्ळात जोरदार रंगली आहे. उद्‌घाटन रखडत असल्याने शहरातील पाणी प्रश्‍नावरून विरोधकांनी वातावरण तापविण्यास सुरुवात केली आहे. गेल्या तीन वर्षांतील पाणीटंचाईला जबाबदार असलेल्या भाजपाकडून श्रेयवादासाठी सुरू असलेल्या या प्रकाराबाबत सर्वसामान्यांमधूनही नाराजी व्यक्त होत आहे.
