पिंपरी :  मुंबई उपनगर रेल्वेतील मुंब्रा-दिवा स्थानकावर सोमवारी झालेल्या दुर्घटनेनंतर असुरक्षितरित्या रेल्वे प्रवास करणाऱ्या रेल्वे प्रवाशांचा मुद्दा ऐरणीवर आला आहे. यापार्श्वभूमीवर पुणे-लोणावळा लोकलसेवेत ‘फूट बोर्ड’वर उभे राहून प्रवास करणाऱ्या प्रवाशांवर दंडात्मक कारवाई करण्याचे आदेश रेल्वे प्रशासनाने दिले आहेत.

मंगळवारपासूनच ह्या आदेशाची अंमलबजावणी सुरू करण्यात आली असून रेल्वे प्रवाशांच्या सुरक्षेसाठी ‘आरपीएफ’द्वारा विशेष मोहीम राबविण्यात येत आहे. नियमभंग करणाऱ्या रेल्वे प्रवाशांवर जागेवरच कारवाई केली जाणार आहे. रेल्वे सुरक्षा बलच्या (आरपीएफ) आयुक्त प्रियांका शर्मा यांनी यासंबंधीचा आदेश दिला आहे. रेल्वे कायद्याच्या १५६व्या कलमानुसार ही कारवाई करण्यात येईल, असे सांगितले आहे.

मुंबईतील रेल्वे दुर्घटनेच्या पार्श्वभूमीवर पुणे रेल्वे प्रशासन ही विशेष मोहीम राबवित आहे. यासाठी ‘आरपीएफ’च्या जवानांना लोकलमध्ये गस्त घालण्याची सूचनाही देण्यात आली आहे. यासह पुणे-लोणावळा दरम्यान असलेल्या विविध स्थानकांपाशी प्रवाशांवर विशेष नजर ठेवली जाईल. धावत्या गाड्यांच्या दारात प्रवासी उभा असल्यास प्रत्यक्ष दंडात्मक कारवाई केली जाईल. त्यामुळे रेल्वे प्रवाशांनी पुणे-लोणावळा दरम्यान प्रवास करताना रेल्वेच्या नियमांचे पालन करण्याचे आणि सुरक्षित प्रवास करण्याचे आवाहन करण्यात आले आहे.

‘फूट बोर्ड’वर उभे राहून प्रवास करणे हा रेल्वे नियमाचा भंग आहेच, सोबत यातून प्रवाशांच्या जीवालाही धोका निर्माण होतो. त्यामुळे संबंधित प्रवाशांवर दंडात्मक कारवाई केली जाणार असल्याचे ‘आरपीएफ’च्या वरिष्ठ विभागीय सुरक्षा आयुक्त प्रियांका शर्मा यांनी सांगितले आहे.