PhilmCGI Awards : पुणेस्थित अग्रगण्य व्हिज्युअल इफेक्ट्स (व्हीएफएक्स) आणि अॅनिमेशन स्टुडिओ फिल्मसीजीआयने ‘धुरंधर’ आणि ‘धुरंधर : द रिव्हेंज’ या चित्रपटांसाठी १०००हून अधिक व्हीएफएक्स शॉट्स तयार करत सिनेसृष्टीत आपली वेगळी छाप उमटवली आहे. टीपीएन गोल्ड प्रमाणपत्रप्राप्त असलेल्या या स्टुडिओच्या कामाची दखल विविध राष्ट्रीय पुरस्कार सोहळ्यांमध्ये घेण्यात आली आहे.

‘जिगरा’, ‘सीटीआरएल’, ‘क्वॉला’, ‘स्ट्रेंजर थिंग्ज’, ‘सेक्रेड गेम्स’, ‘पठाण’, ‘कल्की’, ‘जुबली’ आणि ऑस्करसाठी नामांकन मिळालेल्या ‘होमबाउंड’ यांसारख्या प्रकल्पांमधील कामासाठी ओळखल्या जाणाऱ्या फिल्मसीजीआयने ‘धुरंधर’ चित्रपटांच्या दृश्यविश्व निर्मितीत महत्त्वपूर्ण योगदान दिले आहे.

स्टुडिओला २०२६ मधील झी सिने पुरस्कारांमध्ये ‘बेस्ट व्हीएफएक्स’ आणि स्क्रीन अवॉर्ड्समध्ये ‘बेस्ट स्पेशल इफेक्ट्स’ हा पुरस्कार मिळाला आहे. तसेच प्रतिष्ठित व्हीएएम अवॉर्ड्समध्येही त्यांच्या कामाचा गौरव करण्यात आला. यापूर्वी ‘जुबली’ मालिकेसाठी फिल्मफेअर ओटीटी पुरस्कारांमध्ये ‘बेस्ट व्हीएफएक्स (सिरीज)’ सन्मान मिळाला होता. ‘दिल्ली सफारी’ या चित्रपटाला राष्ट्रीय पुरस्कारांमध्ये ‘सर्वोत्कृष्ट अॅनिमेटेड चित्रपट’ हा मान मिळाला होता.

‘धुरंधर’ आणि ‘धुरंधर : द रिव्हेंज’च्या निर्मितीदरम्यान फिल्मसीजीआयने बी६२ स्टुडिओच्या सर्जनशील टीमसोबत जवळून काम केले. कथानकाला पूरक आणि वास्तववादी वाटतील असे व्हिज्युअल इफेक्ट्स तयार करण्यावर विशेष भर देण्यात आला. दृश्यांमध्ये कृत्रिमता जाणवू नये, तसेच प्रेक्षकांना पडद्यावरील अनुभव अधिक प्रभावी वाटावा यासाठी अत्याधुनिक तंत्रज्ञानाचा वापर करण्यात आला.

चित्रपटातील ‘ल्यारी सेट’ हे त्याचे उल्लेखनीय उदाहरण ठरले. या दृश्यासाठी स्टुडिओने वर्ल्ड-बिल्डिंग, सेट ऑग्मेंटेशन आणि प्रगत कॉम्पोझिटिंग तंत्रांचा वापर करून वातावरणाचा विस्तार केला. परिणामी, पडद्यावर वास्तवदर्शी आणि गजबजलेले दृश्य उभे राहिले. प्रत्येक फ्रेममध्ये बारकाईने केलेल्या कामामुळे हे दृश्य मूळ चित्रीकरणाचा नैसर्गिक भाग असल्याचा भास निर्माण झाला.

सर्जनशीलता आणि तांत्रिक कौशल्य यांचा संगम साधत फिल्मसीजीआय भारतीय तसेच जागतिक चित्रपटसृष्टीतील व्हिज्युअल कथनशैलीला नवी दिशा देत असल्याचे या यशातून अधोरेखित झाले आहे.