Petrol-Diesel: राज्यातील इंधनटंचाईच्या अफवांमुळे बुलढाणा जिल्ह्यात शुक्रवारी पेट्रोल पंपांवर वाहनांच्या लांबलचक रांगा लागल्याचे चित्र पाहायला मिळाले. अनेक ठिकाणी नागरिक पेट्रोल व डिझेलसाठी वाहनांसह तसेच प्लास्टिकच्या कॅन घेऊन पंपांवर गर्दी करत असल्याचे दिसून आले. मात्र प्रशासनाने जिल्ह्यात इंधनाचा कोणताही तुटवडा नसल्याचा दावा करत नागरिकांना घाबरून अतिरिक्त साठा न करण्याचे आवाहन केले आहे. जिल्ह्यातील अनेक पेट्रोल पंपांवर एका बाजूला वाहनांच्या रांगा तर दुसऱ्या बाजूला कॅनच्या ओळी लागल्याचे दृश्य दिसत आहे. सोशल मीडियावरही पेट्रोल पंपांवरील गर्दीचे व्हिडीओ आणि छायाचित्रे मोठ्या प्रमाणात व्हायरल होत आहेत. दरम्यान, खरीप हंगाम जवळ आल्याने शेतकऱ्यांमध्ये डिझेलबाबत चिंता वाढली आहे. डिझेल सहज उपलब्ध होत नसल्याने ट्रॅक्टरची कामे ठप्प पडत असल्याची तक्रार काही शेतकऱ्यांनी केली. जिल्हा पुरवठा आधिकाऱ्याचे स्पष्टीकरण – (Petrol-Diesel) जिल्हा पुरवठा अधिकारी तथा निवासी उपजिल्हाधिकारी सुरेश कावळे यांनी मात्र परिस्थिती नियंत्रणात असल्याचे सांगितले. “जिल्ह्यात इंधनाची कोणतीही कमतरता नाही. नेहमीपेक्षा जास्त प्रमाणात इंधनाचा पुरवठा होत आहे. नागरिकांनी अनावश्यक साठेबाजी करू नये आणि अफवांवर विश्वास ठेवू नये,” असे आवाहन त्यांनी केले. हेही वाचा – राज्यातील पेट्रोल-डिझेलबाबत छगन भुजबळ यांची महत्वाची माहिती; म्हणाले – ‘नागरिकांनी…’ एचपीसीएल (Hindustan Petroleum Corporation Limited ) संचलित लोणार येथील एका पेट्रोल पंपाचा व्हिडीओ सोशल मीडियावर व्हायरल झाला होता. या व्हिडीओत नागरिक कॅन हातात घेऊन पेट्रोल पंपाकडे धावताना दिसत आहेत. यावर एचपीसीएलने आपल्या अधिकृत भूमिकेतून प्रतिक्रिया देत इंधनटंचाईबाबतचा दावा दिशाभूल करणारा असल्याचे म्हटले आहे. Petrol-Diesel: ‘या’ जिल्ह्यात पेट्रोल पंपावर मोठ्या रांगा; जिल्हा पुरवठा अधिकाऱ्यांनी दिले स्पष्टीकरण कृषी हंगामामुळे वाढलेली मागणी आणि काही घाऊक ग्राहकांनी किरकोळ पंपांकडे वळवल्याने काही ठिकाणी ग्राहकांची गर्दी वाढल्याचे कंपनीने स्पष्ट केले. तसेच जिल्ह्यातील सर्व ४८ एचपीसीएल पेट्रोल पंप सुरळीत सुरू असून प्रशासन, वितरक आणि तेल कंपन्या समन्वयाने काम करत असल्याचेही कंपनीने सांगितले.
