Pete Hegseth : अमेरिकेचे संरक्षण मंत्री पीट हेगसेथ (Pete Hegseth) यांनी अमेरिकन लष्करातील जनरल आणि ॲडमिरल या वरिष्ठ अधिकाऱ्यांच्या पदांमध्ये एकूण २० टक्के कपात करण्याच्या निर्णयाला दुजोरा दिला. व्हर्जिनियातील मरीन कॉर्प्स बेस क्वांटिको येथे ‘स्टेट ऑफ द फोर्स’ या भाषणात त्यांनी लष्कराच्या वरिष्ठ नेतृत्वात मोठे बदल करण्याचे संकेत दिले.

तसेच आधुनिक युद्धातील ड्रोन आणि स्वायत्त तंत्रज्ञानाचा वाढता वापर लक्षात घेऊन नवीन ‘फोर-स्टार कमांड’ स्थापन करण्याची घोषणा केली. संरक्षण उत्पादनाला वेग देणे, लष्कराची कार्यक्षमता वाढवणे आणि युद्धासाठी आवश्यक तंत्रज्ञानाच्या वापराला प्राधान्य देणे यावरही त्यांनी भर दिला. हे बदल अमेरिकन लष्कराच्या (Pete Hegseth) भविष्यातील युद्धनीतीत महत्त्वपूर्ण भूमिका बजावणार असल्याचे त्यांनी स्पष्ट केले.

गेल्या वसंत ऋतूत अमेरिकन लष्करातील सुमारे ८०० ‘फ्लॅग’ आणि ‘जनरल ऑफिसर’ पदांमध्ये १० टक्के कपातीचे आदेश देण्यात आले होते. आता ही कपात दुप्पट करून २० टक्के करण्याचे निर्देश संरक्षण मंत्री पीट हेगसेथ यांनी दिले आहेत. ही प्रक्रिया १ जानेवारी २०२७ पर्यंत पूर्ण करण्याचे लक्ष्य ठेवण्यात आले आहे.

नव्या कपातीचा नेमका परिणाम कोणत्या स्तरावरील जनरल आणि ॲडमिरल पदांवर होणार, याचे सविस्तर चित्र अद्याप स्पष्ट झालेले नाही. कायद्यानुसार वरिष्ठ लष्करी अधिकाऱ्यांची पदसंख्या निश्चित असली, तरी काँग्रेसकडे नवीन नियुक्त्यांची नावे न पाठवता काही पदे रिक्त ठेवता येतात.

अमेरिकन संरक्षण मंत्री पीट हेगसेथ (Pete Hegseth) यांनी लष्कराच्या वरिष्ठ नेतृत्वातील बदलांना ‘जबाबदारी निश्चित करणे’ आणि दीर्घकाळ प्रलंबित असलेली कारवाई असे संबोधले. मात्र, या निर्णयावर काँग्रेसमधील काही सदस्यांनी प्रश्न उपस्थित केले आहेत. सिनेटर मार्क केली यांनी वरिष्ठ लष्करी नेतृत्वातील बदलांवर टीका केली, तर रिपब्लिकन सिनेटर माईक राऊंड्स यांनी निर्णयामागील कारणांची सविस्तर माहिती आवश्यक असल्याचे म्हटले.

दरम्यान, हेगसेथ यांनी स्वायत्त आणि रोबोटिक तंत्रज्ञानाच्या वापरावर देखरेख ठेवण्यासाठी नवीन ‘फोर-स्टार कमांड’ स्थापन करण्याची घोषणा केली. आधुनिक युद्धभूमीवर मानवरहित प्रणालींचा वाढता वापर लक्षात घेऊन हा बदल करण्यात येत असल्याचे त्यांनी सांगितले.

संरक्षण उत्पादनावर भर
हेगसेथ (Pete Hegseth) यांनी लष्करातील विविधता कार्यक्रमांमध्ये बदल, महिला सैनिकांचा समावेश असलेल्या जमिनीवरील लढाऊ तुकड्यांचा आढावा आणि पुरुष कर्मचाऱ्यांमधील टेस्टोस्टेरॉनची पातळी तपासण्यासाठी चाचणी कार्यक्रमाचाही उल्लेख केला. अमेरिकन लष्कराच्या वरिष्ठ नेतृत्वातील कपातीसोबतच संरक्षण उत्पादन वाढवण्यावरही प्रशासनाचा भर आहे. मात्र, तज्ज्ञांच्या मते, युद्धात मोठ्या प्रमाणावर वापरल्या गेलेल्या काही प्रमुख शस्त्रास्त्रांचा साठा पुन्हा पूर्ववत करण्यास अमेरिकी संरक्षण कंत्राटदारांना अनेक वर्षे लागू शकतात.