PCMC News – पिंपरी-चिंचवड महापालिकेच्या चिंचवड येथील प्रा. रामकृष्ण मोरे प्रेक्षागृहाचा व्यवस्थापकाने स्वत:च्या पदाचा आणि अधिकाराचा गैरवापर करत तेथे विनापरवाना घरगुती कार्यक्रम घेतला. कुटुंबातील सदस्य आणि नातेवाईकांसाठी जेवण दिले. त्यामुळे त्या सेवानिवृत्त व्यवस्थापकांवर अखेर, आयुक्तांकडून कारवाई करण्यात आली आहे. प्रमोद श्रीकृष्ण सावरकर हे कार्यालय अधिक्षक होते. त्यांच्याकडे प्रा. मोरे प्रेक्षागृहाची व्यवस्थापक म्हणून जबाबदारी होती. प्रेक्षागृहाच्या व्हीआयपी कक्षात त्यांनी घरगुती कार्यक्रम आयोजित केला होता. तेथे पाहुण्यांना जेवण देण्यात आले. हा प्रकार १६ मार्च २०२५ ला घडला. त्या संदर्भात तक्रार प्राप्त झाल्यानंतर क्रीडा विभागाने त्या घटनेची चौकशी केली. त्या तक्रारीत तथ्य आढळून आले. त्यानुसार व्यवस्थापक सावरकर यांना क्रीडा विभागाचे उपायुक्त पंकज पाटील यांनी कारणे दाखवा नोटीस बजावली. व्हीआयपी कक्षात अधिकारी, पदाधिकारी व कलाकार जेवण करतात. मग माझ्या कुटुंबातील सदस्यांनी तेथे जेवण केल्यास गैर नाही, असा खुलासा सावरकर यांनी केला आहे. तो खुलासा संयुक्तिक नसल्याने सावरकर यांना आपल्या पदाचा आणि अधिकाराचा गैरवापर केल्याचे सिद्ध झाले आहे. त्यामुळे सावरकर यांना २ हजार रुपयांचा दंड करण्यात आला आहे. तो दंड त्यांच्या पेन्शनमधून वसूल करण्यात येणार आहे, असा आदेश आयुक्त डॉ. विजय सूर्यवंशी यांनी सामान्य प्रशासन विभागास दिले आहेत.
