प्रभात वृत्तसेवा पिंपरी – पिंपरी चिंचवड महापालिकेसाठी स्वबळावर तयारी करणाऱ्या भाजपच्या स्थानिक पदाधिकाऱ्यांची वरिष्ठ नेत्यांनी हवा काढून घेतली आहे. महापालिकेसाठी मैत्रीपूर्ण लढती करणार असून ज्या प्रभागात युती होईल तिथे युती तर बाकीच्या प्रभागात स्वबळावर अशी हायब्रिड युती करणार असल्याचे उच्च व तंत्रशिक्षण मंत्री चंद्रकांत पाटील यांनी स्पष्ट केले. मुख्यमंत्री देवेंद्र फडणवीस यांनी महापालिकांसाठी महायुती म्हणूनच लढायचे असे आदेश दिले असल्याचे देखील त्यांनी सांगितले. त्यामुळे गेल्या वर्षभरापासून शहरामध्ये स्वबळावर लढण्याच्या तयारीत असलेल्या भाजपच्या स्थानिक पदाधिकार्यांची चांगलीच गोची झाली आहे. कधी स्थानिक पदाधिकारी ठरवतील तर कधी सोबत लढू अशी भाजपच्या वरिष्ठ नेत्यांकडून वारंवार भूमिका बदलली जात असल्याने स्थानिक पदाधिकाऱ्यांची चांगलीच गोची झाली आहे.उच्च व तंत्रशिक्षण मंत्री चंद्रकांत पाटील यांनी शुक्रवारी (दि. ७) पिंपरी चिंचवड महापालिकेत विविध विभागांचा आढावा घेतला. त्यानंतर पत्रकारांशी बोलताना त्यांनी भाजप महायुती म्हणून एकत्र लढण्यास इच्छुक असल्याचे स्पष्ट केले. ते म्हणाले, मुख्यमंत्री देवेंद्र फडणवीस यांनी संपूर्ण राज्यात दौरा केला आहे. स्थानिक स्वराज्य संस्थांच्या निवडणुकांबाबत त्यांनी प्रत्येक जिल्ह्याला एक तास वेळ देत आढावा घेतला आहे. त्यामध्ये त्यांनी शक्यतो निवडणुका या महायुती म्हणून लढवल्या पाहिजे असे मत मांडले आहे. ज्या ठिकाणी महायुती म्हणून निवडणुका शक्य नाही त्याठिकाणी हायब्रिड युती केली पाहिजे. म्हणजेच पिंपरी चिंचवड महापालिकेमध्ये ३२ प्रभाग आहेत. तर त्या ३२ पैकी किमान २२ प्रभागांमध्ये एकत्र निवडणूक लढवली पाहिजे. उर्वरित १० ठिकाणी स्वबळावर लढले तरी चालेल. ज्याठिकाणी युती करणे शक्यच नाही किंवा ज्याठिकाणी ज्या पक्षाची ताकद जास्त आहे, तिथे त्यांनी स्वबळावरच लढले पाहिजे. मात्र, महायुती म्हणून एकत्र लढण्याचेच आदेश मुख्यमंत्र्यांनी दिले आहेत.गेल्या काही दिवसांपूर्वी राष्ट्रवादी काँग्रेस अजित पवार पक्षाचे स्थानिक पदाधिकारी निवडणूक महायुती म्हणून एकत्र लढविण्याच्या मानसिकतेत होते. हा घोटळा मुख्यमंत्र्यांनी काढला नाही.. पार्थ पवार यांच्या कथित जमीन घोटाळ्याप्रकरणी अनेकजण निवडणुका डोळ्यासमोर ठेवून हा घोटाळा मुख्यमंत्री देवेंद्र फडणवीस आणि भाजपाने समोर आणला असल्याचे म्हणत आहेत. मात्र, काही गोष्टी या समोर येत असतात. त्या काढाव्या लागत नाही. या प्रकरणाची चौकशी करण्यात येईल. मात्र, हा घोटाळा मुख्यमंत्री देवेंद्र फडणवीस किंवा भाजपाने काढला नसल्याचे पाटील यांनी स्पष्ट केले. विधानसभानिहाय आढावा बैठकी.. चंद्रकांत पाटील हे शहरातील तीनही विधानसभा मतदासंघाचा तीन दिवस आढावा घेणार आहेत. पहिल्या दिवशी शुक्रवारी चिंचवड, त्यानंतर शनिवारी पिंपरी व रविवारी भोसरी विधानसभा मतदारसंघाचा ते आढावा घेणार आहेत. त्यापूर्वी त्यांनी महापालिकेतील विविध विभागांची माहिती मागवली होती. त्यामध्ये रस्त्यांमधील खड्डे, इंद्रायणी नदी सुधार प्रकल्प, भामा आसखेड पाणी प्रकल्प या कामांचा त्यांनी आढावा घेतला. शहरातील रस्त्यांवर मोठ्या प्रमाणावर खड्डे असल्याने त्यांनी नाराजी व्यक्त केली. प्रशासनाने गेल्या सहा महिन्यांपासून सातत्याने पाऊस पडत आहे. त्यामुळे डांबरीकरण करता येत नाही. तसेच खड्डे देखील बुजवता येत नसल्याचे स्पष्टीकरण दिले. “राज्यामध्ये नगरपंचायतींच्या निवडणुका सुरू झाल्या आहेत. त्यामध्ये अनेक ठिकाणी युती आहे. निवडणुकीसाठी कार्यकर्ता राबत असतो. त्याला न्याय मिळाला पाहिजे. त्यासाठी बऱ्याच ठिकाणी युती केली जात नाही. मात्र, महापालिकांच्या निवडणुकांमध्ये जास्तीजास्त ठिकाणी युती करा असे आदेश मुख्यमंत्री फडणवीस यांनी दिले आहेत.” – चंद्रकांत पाटील, उच्च व तंत्रशिक्षण मंत्री.
