PCMC 52 Crore Scam – पिंपरी-चिंचवड महापालिकेत गाजत असलेल्या उपसूचनांद्वारे ५२ कोटींच्या निधी प्रकरणातील दोषी नगरसेवकांचे निलंबन करण्याची मागणी करत मनसेच्या वतीने महापालिका भवनाच्या प्रवेशद्वारावर आंदोलन करण्यात आले. महापालिकेच्या सर्वसाधारण सभेपूर्वी महापालिका प्रवेशद्वारासमोर मनसेच्या पदाधिकाऱ्यांना जोरदार घोषणाबाजी करत आंदोलन केले. तसेच येणाऱ्या पदाधिकाऱ्यांना फलक दाखवत या प्रकरणी कारवाईची मागणी केली. मनसेने दिलेल्या निवेदनात म्हटले आहे की, निधीचा अपहार व बेकायदेशीर कृत्य महानगरपालिकेत ५२ कोटींच्या निधीबाबत नियमबाह्य उपसूचना देऊन बिले अदा करण्याचा जो प्रकार उघडकीस आला आहे, तो महाराष्ट्र महानगरपालिका अधिनियम (MMC Act) मधील तरतुदींचे उघड उल्लंघन आहे. जनतेच्या करातून जमा झालेला पैसा चुकीच्या पद्धतीने वळवणे हा फौजदारी स्वरूपाचा गुन्हा आहे. नगरसेवकांची थेट संलिप्तता असलेल्या या प्रकरणात प्रशासनाने आतापर्यंत केवळ काही अधिकाऱ्यांवर कारवाईचा बडगा उगारून मूळ सूत्रधारांना अभय देण्याचे धोरण अवलंबल्याचे दिसून येत आहे. ज्या लोकप्रतिनिधींनी या वादग्रस्त उपसूचनेवर स्वाक्षऱ्या केल्या आहेत, तेच या आर्थिक गैरव्यवहाराचे मुख्य लाभार्थी आणि सूत्रधार आहेत. अनर्हतेची मागणी महाराष्ट्र महानगरपालिका अधिनियमातील कलम १० व कलम १३ मधील तरतुदींनुसार, पदाचा गैरवापर करणाऱ्या किंवा महापालिकेचे आर्थिक नुकसान करणाऱ्या लोकप्रतिनिधींना पदावरून दूर करण्याचे अधिकार शासनास आहेत. अशा भ्रष्ट प्रवृत्तींना चाप लावण्यासाठी संबंधित स्वाक्षरी करणाऱ्या सर्व नगरसेवकांचे सदस्यत्व त्वरित रद्द करणे आवश्यक आहे. या प्रकरणाची सखोल चौकशी करून दोषी नगरसेवकांचे पद तात्काळ रद्द करावे आणि त्यांच्यावर कठोर प्रशासकीय व कायदेशीर कारवाई करावी. केवळ अधिकाऱ्यांवर कारवाई करून हा विषय दाबण्याचा प्रयत्न करू नये. येत्या ७ दिवसांच्या आत जर शासनाने आणि प्रशासनाने यावर ठोस पावले उचलली नाहीत तर तीव्र स्वरूपाचे जनआंदोलन आणि उपोषण छेडले जाईल.
