Satara: मध्यवर्ती एसटी बस स्थानकाच्या नूतनीकरणाचा मुहूर्त अखेर ठरला असून दसऱ्यापासून प्रत्यक्ष बांधकामाला सुरुवात करण्याच्या हालचालींना वेग आला आहे. तीन वर्षांपूर्वी मंजुरी मिळून निधी उपलब्ध झाल्यानंतरही पर्यायी जागेचा प्रश्न सुटत नसल्याने रखडलेला हा प्रकल्प आता आहे त्याच जागेवर टप्प्याटप्प्याने राबविण्यात येणार आहे. बांधकामादरम्यान प्रवाशांची गैरसोय टाळण्यासाठी गुरुवारपासून पत्र्यांचे सुरक्षा कुंपण उभारण्याचे काम हाती घेण्यात येणार आहे. त्यानंतर जुन्या इमारतीचा काही भाग पाडून नव्या बांधकामाचा मार्ग मोकळा केला जाईल.

जिल्हा पर्यटनाच्या दृष्टीने महत्त्वाचा असल्याने येथील बस स्थानकावर वर्षभर प्रवाशांची मोठी वर्दळ असते. महाबळेश्वर, पाचगणी, कास आणि बामणोली या पर्यटनस्थळांकडे जाणाऱ्या शेकडो एसटी गाड्यांची दररोज ये- जा सुरू असते. त्यामुळे मध्यवर्ती बस स्थानकावर प्रवासी आणि वाहतुकीचा ताण वाढत आहे. सध्याची इमारतही अपुरी पडत असल्याने तिच्या नूतनीकरणाची गरज अनेक वर्षांपासून व्यक्त होत होती.

एसटी महामंडळाने वरिष्ठ पातळीवर पाठपुरावा केल्यानंतर नवीन इमारतीस मंजुरी आणि निधी मिळाला. मात्र, बांधकाम सुरू असताना नियमित बस फेऱ्यांचे नियोजन करता यावे, यासाठी पर्यायी जागेचा शोध सुरू होता. जागा उपलब्ध न झाल्याने अखेर सध्याच्या जागेतच बांधकाम करण्याचा निर्णय विभाग नियंत्रक ज्योती गायकवाड यांनी घेतला आहे. संपूर्ण इमारत एकाच वेळी पाडल्यास प्रवाशांसह बससेवेच्या नियोजनावर परिणाम होण्याची शक्यता आहे. त्यामुळे पहिल्या टप्प्यात वाहतूक नियंत्रण कक्ष, पोलिस चौकी, प्रशासकीय कार्यालय आणि उपाहारगृह असलेला अर्धा भाग पाडण्यात येणार आहे. त्यानंतर कामाची प्रगती आणि उपलब्ध जागेचा आढावा घेऊन पुढील टप्प्याबाबत निर्णय घेतला जाणार आहे.

मुक्कामी ३१ बसच्या जागांमध्ये बदल

पुनर्बांधणी करताना जागेची अडचण लक्षात घेऊन बांधकामाच्या परिसरात प्रवाशांचा वावर होऊ नये आणि कामात अडथळे निर्माण होऊ नयेत, यासाठी पत्र्यांचे कुंपण उभारले जाणार आहे. बसस्थानकातील जागा कमी होणार असल्याने नेहमी मुक्कामी असणाऱ्या ३१ एसटी गाड्यांच्या ठिकाणांमध्ये बदल करण्यात आला असून, संबंधित गाड्यांसाठी पर्यायी व्यवस्था करण्यात आली आहे. कोरेगाव, फलटण, वाई, पाटण, कराड, महाबळेश्वर, मेढा आणि वडूज आगारांतील गाड्यांचा यात समावेश आहे.