रांजणी : आंबेगाव तालुक्यातील पारगाव – जारकरवाडी जिल्हा परिषद गटात होणाऱ्या निवडणुकीकडे सर्वांचे लक्ष लागून राहून लागले आहे. या जिल्हा परिषद गटात माजी सहकारमंत्री आणि विद्यमान आमदार दिलीप वळसे-पाटील यांचे निरगुडसर गाव समाविष्ट आहे. त्यामुळे साहजिकच या जिल्हा परिषद गटात राष्ट्रवादी काँग्रेस पक्ष अजित पवार गटाची प्रतिष्ठा पणाला लागणार आहे. दरम्यान एक वर्षापूर्वी झालेल्या विधानसभा निवडणुकीत आमदार दिलीप वळसे पाटील यांचा बालेकिल्ला असलेल्या या जिल्हा परिषद गटात विरोधी शरदचंद्र पवार गटाचे पराभूत उमेदवार देवदत्त निकम यांनी 300 मतांची आघाडी घेतली होती. अशा परिस्थितीत आता होणाऱ्या जिल्हा परिषद निवडणुकीत मतदार कुणाला कौल देणार ? हा विषय महत्त्वाचा ठरणार आहे. त्यातच या जिल्हा परिषद गटामध्ये राष्ट्रवादी काँग्रेस (अजित पवार गट) पक्षाकडून जिल्हा परिषदेचे माजी उपाध्यक्ष विवेक वळसे पाटील आणि अरुण गिरे यांची नावे चर्चेत आहेत. शिवसेना एकनाथ शिंदे गटाने होणाऱ्या जिल्हा परिषद निवडणुकीत राष्ट्रवादी काँग्रेस बरोबर जाण्याची भूमिका नाकारल्याने या जिल्हा परिषद गटात शिवसेना एकनाथ शिंदे गटाकडून रवींद्र जनार्दन वळसे पाटील यांचे नाव चर्चिले जात आहे. 2017 साली झालेल्या जिल्हा परिषद निवडणुकीत पारगांव – जारकरवाडी जिल्हा परिषद गटात विवेक वळसे पाटील यांच्या विरोधात तत्कालीन शिवसेनेत राहिलेले अरुण गिरे यांनी निवडणूक लढवली होती. त्यावेळी अरुण गिरे यांना थोड्या फार मताने पराभवाला सामोरे जावे लागले होते. परंतु आता अरुण गिरे पुन्हा राष्ट्रवादी काँग्रेस पक्ष अजित पवार गटात स्वगृही परतल्याने त्यांचे नाव पुन्हा एकदा जिल्हा परिषद निवडणूक लढवण्यासाठी चर्चेत आले आहे. मात्र, अशा परिस्थितीत राष्ट्रवादी काँग्रेस पक्ष कुणाला संधी देणार हे पाहणे औत्सुक्याचे ठरणार आहे. खरे तर होणारी जिल्हा परिषद निवडणूक माजी सहकार मंत्री दिलीप वळसे पाटील यांच्या दृष्टीने अत्यंत महत्त्वाची असून त्या दृष्टिकोनातून जिल्हा परिषदेचे उपाध्यक्ष म्हणून पद भुषवलेले विवेक वळसे पाटील आणि अरुण गिरे दोघेही मातब्बर उमेदवार सध्या चर्चेत आहे. मात्र, उमेदवारी कोणाला द्यायची हे महत्त्वाचे ठरणार आहे. माजी सहकार मंत्री दिलीप वळसे-पाटील यांनी योग्य निर्णय घेऊन आणि जनमताचा कौल घेऊनच कोणाला उमेदवारी द्यायची हा निर्णय घ्यायचा आहे. बंडखोरीची शक्यता… पारगाव -जारकरवाडी जिल्हा परिषद गटात विधानसभेच्या निवडणुकीत वळसे पाटील हे पिछाडीवर राहिले. त्यामुळे आगामी होणाऱ्या जिल्हा परिषद निवडणुकीत राष्ट्रवादी काँग्रेस पक्षाला आपली पूर्ण ताकद पणाला लावावी लागणार हे देखील तितकेच खरे ! यदाकदाचित जर राष्ट्रवादी काँग्रेस पक्ष अजित पवार गटाकडून विद्यमान सदस्य आणि जिल्हा परिषदेचे उपाध्यक्ष पद भूषविलेले विवेक वळसे पाटील यांना पक्षाने संधी दिली. तर त्याच पक्षातील इच्छुक असलेले अरुण गिरे हे बंडखोरी करण्याची शक्यता नाकारता येत नाही आणि असे जर झाले तर त्याचा फायदा निश्चितच विरोधी पक्षाच्या उमेदवाराला होईल हे देखील नाकारून चालणार नाही. तर शिवसेनेचीही मदत जिल्हा परिषदेचे उपाध्यक्ष पद भूषवलेले इच्छुक असलेले अरुण गिरे यांचादेखील या मतदारसंघात दांडगा जनसंपर्क असून त्यांना मानणारा मोठा वर्ग आहे. गिरे हे शिवसेनेत असतानाही त्यांनी या मतदारसंघात आपली राजकीय पकड तितकीच घट्ट ठेवलेली दिसून येते. जर पक्षाने गिरे यांना उमेदवारी दिली तर शिवसेना एकनाथ शिंदे गटाकडून त्यांना मदत होऊ शकते, असा गिरे समर्थकांचा दावा आहे.
