Protest in Gilgit-Baltistan : पाकव्याप्त काश्मीरमध्ये महागाईने सर्वसामान्यांचे कंबरडे मोडले आहे. वाढत्या महागाईविरोधात आता जनता रस्त्यावर आली आहे. एएनआय वृत्तसंस्थेनुसार, गिलगिट-बाल्टिस्तानमध्ये जनजीवन पूर्णपणे ठप्प झाले आहे. गव्हाच्या दरवाढीविरोधात मोठ्या प्रमाणात निदर्शने होत आहेत. दोन वेळचे जेवणासाठी येथील नागरिकांचे मोठे हाल होत आहेत.

पाकिस्तानी वृत्तपत्र डॉनच्या वृत्तानुसार, गिलगिट-बाल्टिस्तानच्या सर्व जिल्ह्यांमध्ये मोठ्या प्रमाणात निदर्शने होत आहेत. या निदर्शनात लोक सहभागी होत असल्याने वाहतूकही बंद करण्यात आली आहे. याशिवाय गिलगिट, स्कर्दू, दियामेर, घैसर, अस्टोरे, शिघर, घांचे, खरमांग आणि हुंजा येथील विविध भागातील दुकाने, बाजार, रेस्टॉरंट आणि व्यवसाय केंद्रे शुक्रवारी बंद राहिली.

डॉनच्या वृत्तानुसार, अवामी कृती समितीने व्यापारी, वाहतूकदार आणि हॉटेल मालकांचे प्रतिनिधीत्व करणाऱ्या संघटनांशी चर्चा करून संपाची हाक दिली आहे.

इंटरनेट सेवा बंद –

पाकिस्तानच्या इन्स्टिट्यूट ऑफ डेव्हलपमेंट अँड इकॉनॉमिक अल्टरनेटिव्हजच्या संशोधक मरियम एस खान यांनी सांगितले की, पीओकेच्या सर्वात मोठ्या टेलिकॉम ऑपरेटर, स्पेशल कम्युनिकेशन्स ऑर्गनायझेशनने गिलगिट-बाल्टिस्तानमध्ये इंटरनेट सेवा बंद केली आहे.

त्याच वेळी, एका x वापरकर्त्याने सांगितले की, गिलगिट-बाल्टिस्तान हा पाकिस्तानचा एकमेव भाग आहे जिथे लोकांकडे स्वतःची जमीन नाही. डॉनच्या वृत्तानुसार, अवामी कृती समितीने आजपासून वाढत्या महागाईविरोधात गिलगिट आणि स्कार्डूच्या दिशेने मोर्चा निघणार असल्याची घोषणा केली आहे.

गिलगिट-बाल्टिस्तान सरकारने इशारा दिला –
अनुदानित गव्हाच्या दरात वाढ करण्याच्या गिलगिट-बाल्टिस्तान सरकारच्या निर्णयाचा लोकांनी निषेध केला आणि हे मुख्यमंत्र्यांचे अपयश असल्याचे म्हटले. त्यांच्या मागण्या मान्य न झाल्यास काराकोरम महामार्ग बंद करण्यात येईल, असा इशाराही त्यांनी दिला.