इस्लामाबाद – पाकिस्तानचे पंतप्रधान इम्रान खान यांनी रविवारी पाकिस्तानच्या पंजाब प्रांतात भारताचे क्षेपणास्त्र पडल्याच्या मुद्द्यावर प्रतिक्रिया दिली. पाकिस्तानच्या हद्दीत भारतीय क्षेपणास्त्र पडल्यानंतर पाकिस्तान भारताला प्रत्युत्तर देऊ शकला असता, पण आम्ही संयम दाखवला, असे इम्रान खान म्हणाले. 9 मार्च रोजी भारतीय सुपरसॉनिक क्षेपणास्त्र पाकिस्तानच्या हद्दीत पडले होते. क्षेपणास्त्र लाहोरपासून 275 किमी अंतरावर असलेल्या मियां चन्नूजवळील शीतगृहावर आदळले. मात्र, क्षेपणास्त्र पडल्यामुळे पाकिस्तानमध्ये कोणतीही जीवित वा वित्तहानी झालेली नाही. मियां चन्नू येथे भारतीय क्षेपणास्त्र पडल्यानंतर आम्हीही प्रत्युत्तर देऊ शकलो असतो, पण आम्ही संयम दाखवला, असे इम्रान खान यांनी याप्रकरणी पहिल्यांदाच आपल्या प्रतिक्रियेत म्हटले आहे. पंतप्रधान इम्रान खान यांनी रविवारी पंजाबमधील हाफिजाबाद येथे विरोधकांच्या अविश्वास ठरावादरम्यान एका सभेत ही माहिती दिली. देशाच्या लष्करी तयारीबद्दल इम्रान म्हणाले की, आपल्याला आपले सैन्य आणि देश मजबूत करायचा आहे. पाकिस्तानच्या परराष्ट्र कार्यालयाने शनिवारी सांगितले की, पाकिस्तानच्या पंजाब प्रांतात क्षेपणास्त्र अपघाताने पडल्याच्या भारताच्या सामान्य स्पष्टीकरणावर ते समाधानी नाहीत आणि त्यांनी संयुक्त चौकशीची मागणी केली. क्षेपणास्त्र पाकिस्तानच्या हद्दीत पडल्याने वस्तुस्थितीची पुष्टी करण्यासाठी पाकिस्तानने या घटनेची संयुक्त चौकशी करण्याचा प्रस्ताव नवी दिला असल्याचे पाकिस्तानच्या परराष्ट्र कार्यालयाने सांगितले होते. क्षेपणास्त्राच्या अपघाती प्रक्षेपणाची माहिती तात्काळ देण्यात भारत अपयशी ठरल्याचे त्यात म्हटले आहे. क्षेपणास्त्र आणि भारताच्या सुरक्षेच्या उपाययोजनांवरही पाकिस्तानने प्रश्न उपस्थित केले आहेत. नियमित देखभाल कार्यादरम्यान तांत्रिक बिघाडामुळे हे क्षेपणास्त्र चुकून सोडण्यात आल्याचा दावा भारताने केला आहे. भारताने या घटनेच्या उच्चस्तरीय चौकशीचे आदेश दिले आहेत.
