सासवड : जागतिक महिला दिनानिमित्त सासवड नगरपरिषदेच्या महिला व बालकल्याण समितीमार्फत शहरातील विविध क्षेत्रात उल्लेखनीय कार्य करणाऱ्या महिलांचा सन्मान करण्यात आला. सासवड येथे आचार्य अत्रे सभागृहात आयोजित कार्यक्रमात सुमारे २०० महिलांचा सन्मानचिन्ह देऊन गुणगौरव करण्यात आला. महिलांच्या सर्वांगीण सक्षमीकरणाच्या उद्देशाने आरोग्य, कायदेविषयक मार्गदर्शन, सेल्फ डिफेन्स प्रशिक्षण, बचत गटातील महिलांनी तयार केलेल्या वस्तूंच्या विक्रीसाठी विशेष स्टॉल्सची व्यवस्था केली होती. विविध क्षेत्रात यश मिळवलेल्या ९० महिलांसह नगरपरिषदेच्या महिला सफाई कर्मचारी, नगरपरिषद शाळेतील शिक्षिका, महिला बचत गटातील उद्योजिका आदी २०० महिलांचा सन्मान करण्यात आला. कार्यक्रमास नगराध्यक्षा आनंदीकाकी चंदुकाका जगताप, ग्रामीण संस्थेच्या संस्थापक अध्यक्षा राजवर्धिनीताई संजय जगताप, उपविभागीय अधिकारी वर्षा लांडगे या प्रमुख पाहुण्या म्हणून उपस्थित होत्या. महिलांच्या आरोग्याविषयी प्रसिद्ध स्त्रीरोग तज्ज्ञ व वंध्यत्व तज्ज्ञ डॉ. सुचेता भालेराव यांनी मार्गदर्शन केले. कायदेविषयक माहिती पोलीस उपनिरीक्षक अर्चना पाटील यांनी दिली. महिलांच्या स्वसंरक्षणाबाबत पायल वाघोले आणि दुर्गा बोराटे यांनी प्रत्यक्ष प्रात्यक्षिकासह प्रशिक्षण दिले. यावेळी महिला व बालकल्याण समितीच्या सभापती प्रियांका साकेत जगताप, महिला व बालकल्याण समितीच्या उपसभापती लीना सौरभ वढणे, समिती सदस्य स्मिता जगताप, दीपाली जगताप, उपनगराध्यक्ष मनोहर जगताप, मुख्याधिकारी डॉ. कैलास चव्हाण, नगरसेवक, नगरसेविका, महिला उपस्थित होत्या. कार्यक्रमाचे नियोजन कार्यालय अधीक्षक नूतन जाधव, लिपिक प्राजक्ता राजगुरु, अनुराधा भोकरे, एनयूएलएम विभागाच्या जस्मिन मधाळे यांनी केले. सूत्रसंचालन नगरपरिषद शाळेतील वर्षाराणी शिर्के, स्वाती देवकर, स्मिता जगदाळे, संतोष देवकर यांनी केले. दहा महिला ठरल्या भाग्यवान नगरपरिषदेशी संलग्न १७ महिला बचत गटांनी या कार्यक्रमात सहभाग घेतला होता. गटांमधील महिलांनी उन्हाळी पदार्थ, लोणची, मसाले, कपडे, दागिने व विविध खाद्यपदार्थांचे स्टॉल लावून आपली उत्पादने विक्रीसाठी ठेवली होती. यामुळे बचत गटातील महिलांना आपल्या उत्पादनांना बाजारपेठ उपलब्ध झाली. कार्यक्रमाचे आणखी एक आकर्षण म्हणजे उपस्थित महिलांमधून १० भाग्यवान महिलांना पैठणी भेट देण्यात आली. हेही वाचा : Pimpri News : शहरातील भटक्या कुत्र्यांचा प्रश्न गंभीर; प्रभागनिहाय श्वान संगोपन केंद्र स्थापन करणार
