Sharad Pawar : आजारावर मात करून शरद पवार पुन्हा मैदानात! राष्ट्रवादीचे दिग्गज नेते एकाच व्यासपीठावर येणार
Sharad Pawar : प्रकृतीत सुधारणा होताच शरद पवार पुन्हा एकदा राजकीय आणि सामाजिक कार्यक्रमांना उपस्थित राहणार आहेत.

Sharad Pawar : राष्ट्रवादी काँग्रेसचे ज्येष्ठ नेते शरद पवार यांच्या प्रकृतीत सुधारणा झाल्यानंतर ते पुन्हा एकदा सार्वजनिक आणि राजकीय कार्यक्रमांमध्ये सक्रिय होणार आहेत. धाराशिव आणि सोलापूर जिल्ह्याच्या दुष्काळी दौऱ्यादरम्यान त्यांची प्रकृती अचानक बिघडली होती. श्वास घेण्यास त्रास होत असल्याने त्यांना प्रथम पुण्यातील रुबी हॉल रुग्णालयात, त्यानंतर मुंबईतील ब्रीच कँडी रुग्णालयात उपचारासाठी दाखल करण्यात आले होते. उपचारानंतर आता त्यांची प्रकृती स्थिर आहे.
प्रकृतीत सुधारणा होताच शरद पवार पुन्हा एकदा राजकीय आणि सामाजिक कार्यक्रमांना उपस्थित राहणार आहेत. उद्या पुणे जिल्ह्यातील ओतूर येथे आयोजित राज्यव्यापी सत्यशोधक समाजाच्या अधिवेशनाला ते हजेरी लावणार आहेत. या अधिवेशनाचे उद्घाटन शरद पवार यांच्या हस्ते होणार असून, अध्यक्षस्थानी शाहू महाराज असणार आहेत.
शरद पवार, छगन भुजबळ, वळसे पाटील एकत्र
या कार्यक्रमाचे आणखी एक वैशिष्ट्य म्हणजे राष्ट्रवादी काँग्रेसमधील दिग्गज नेते एकाच व्यासपीठावर दिसणार आहेत. शरद पवार यांच्यासोबत छगन भुजबळ आणि दिलीप वळसे पाटील यांचीही उपस्थिती असणार आहे. त्यामुळे या अधिवेशनाकडे राजकीय वर्तुळाचे विशेष लक्ष लागले आहे. या निमित्ताने राष्ट्रवादीतील नेत्यांमध्ये कोणत्या विषयांवर चर्चा होते, याबाबतही उत्सुकता निर्माण झाली आहे.
वयाच्या ८६ व्या वर्षीही शरद पवार यांचा राजकारणातील प्रभाव कायम असल्याचे वेळोवेळी दिसून आले आहे. प्रकृतीच्या कारणास्तव त्यांना काही वेळा रुग्णालयात दाखल व्हावे लागले असले, तरी उपचारानंतर ते पुन्हा सार्वजनिक जीवनात सक्रिय होताना दिसतात. आताही आजारावर मात करत ते पुन्हा राजकीय आणि सामाजिक कार्यक्रमांसाठी सज्ज झाले आहेत.
उपमुख्यमंत्री सुनेत्रा पवार नांदेड जिल्ह्याच्या दौऱ्यावर
दरम्यान, राज्याच्या उपमुख्यमंत्री सुनेत्रा पवार या नांदेड जिल्ह्याच्या दौऱ्यावर आहेत. या दौऱ्यात त्या जिल्ह्यातील दुष्काळी परिस्थितीचा आढावा घेणार आहेत. तसेच कंधार येथे नव्याने उभारण्यात आलेल्या १०० खाटांच्या उपजिल्हा रुग्णालयाचे त्यांच्या हस्ते लोकार्पण होणार आहे. याशिवाय जिल्ह्यातील विविध विकासकामांचे उद्घाटनही त्यांच्या हस्ते करण्यात येणार आहे.






