चंद्रपूर : महाराष्ट्र राज्यातील शेतकरी आत्महत्या हा एक मोठा प्रश्न आहे. शेतकरी शेतीसाठी घेतलेले कर्ज वेळेत भरू शकला नाही, की त्यावरील व्याजाची रक्कम वाढत जाते. परिणामी कर्जाचा डोंगरही वाढत जातो. अखेर वाढलेल्या पैशांचा रक्कमा पाहून बळीराजा आपले मृत्यूला कवटाळतो. सरकार शेतकऱ्यांसाठी योजना राबवत असले तरी त्याचा फायदा सगळ्याच शेतकऱ्यांना होतो असे नाही. अजूनही अनेक शेतकरी मिळणाऱ्या विविध लाभापासून वंचित आहेत. चंद्रपूर जिल्ह्यातून अशी एक धक्कादायक बातमी समोर आली आहे , ज्यामुळे राज्यात खळबळ उडाली आहे. कर्जाचा परतावा करण्यासाठी सावकाराने शेतकऱ्याला किडनी विकायला लावली असल्याचा धक्कादायक प्रकार उघडकीस आला आहे. चंद्रपूर जिल्हातील नागभीड तालुक्यातील मिंथुर गावात हा धक्कादायक प्रकार घडला आहे. किडनी विकलेल्या शेतकऱ्याचे नाव रोशन सदाशिव कुडे असे असून ते चंद्रपूर जिल्हातील मिंथुर गावातील रहिवाशी आहेत. या धक्कादायक प्रकाराने माणुसकीला काळिमा फासला आहे. नेमकं काय घडलं? रोशन कुडे हे शेतकरी असून त्यांच्याकडे चार एकर शेती आहे. या शेतीवरच त्यांचा उदरनिर्वाह चालतो. शेतीसोबतच त्यांनी दुग्ध व्यवसाय करण्याचे ठरवले. त्यानुसार त्यांनी गाई खरेदी केल्या. या गाई खरेदी करण्यासाठी त्यांनी दोन सावकारांकडून 50-50 हजार रुपये घेतले. मात्र, नशिबाने त्यांची साथ दिली नाही आणि खरेदी केलेल्या गाई मरण मावल्या. त्यामुळे रोशन यांनी पाहिलेलं स्वप्न मातीतच विरून गेले. आता रोशन यांच्यापुढे प्रश्न होता तो घेतलेली रक्कम परत करण्याचा. त्यासाठी रोशन यांनी दोन एकर जागा विकली. ट्रॅक्टर आणि घरातील सामान विकलं. मात्र, कर्ज काही संपेना. यातच एक लाख रुपये घेतलेल्या खर्जाची रक्कम थेट ७४ लाख झाली. दिवसाला १० हजार या प्रमाणे ती रक्कम वाढत गेली. यातून बाहेर पडल्यासाठी करावं तरी काय असा प्रश्न रोशन यांना पडला होता. शेवटी कर्ज घेतलेल्या एका सावकाराने किडनी विकण्याचा सल्ला त्यांना दिला. त्यानुसार एका एजंटने रोशन कुडे यांना कोलकत्ता येथे नेलं. तिथे त्यांची वैद्यकीय तपासणी केली. त्यानंतर त्यांची कंबोडिया येथे शस्त्रक्रिया झाली आणि किडनी काढण्यात आली. ही किडनी कुडे यांनी आठ लाखाला विकली. त्यांच्यावर अन्याय झाला असल्याचे त्यांच्या लक्षात येताच रोशन कुडे पोलीस अधिक्षकांकडे तक्रार दिली. मात्र, कुठलीच कारवाई करण्यात आलेली नाही, असा आरोप त्यांनी केला आहे. या धक्कादायक प्रकारानंतर महाराष्ट्रभर या घटनेची चर्चा आहे. आत्मदहन करण्याचा इशारा १ लाख रुपयांच्या घेतलेल्या कर्जाचे ७४ लाख रुपये झाले. शेती ट्रक्टर सारे काही विकूनही पैसे फिटले नाहीत. म्हणून किडनीही विकली आता शेतकरी रोशन कुडे यांच्याकडे काहीच उरलेले नाही. यामुळे मंत्रालयात संपूर्ण कुटुंबासह त्यांनी आत्मदहन करण्याचा इशारा दिला आहे. हेही वाचा : Celina Jaitly: सेलिना जेटलीने पतीकडून १०० कोटींची भरपाई आणि दरमहा १० लाखांचा खर्च मागितला
