पुणेः जिल्ह्यातील दौंड तालुक्यातून संतापजनक प्रकार समोर आला आहे. सातवीत शिकणाऱ्या एका अल्पवयीन विद्यार्थ्याने त्याच्याच वर्गात शिकणाऱ्या विद्यार्थ्यीनीवर बलात्कार करावा आणि नंतर तिचा खून करावा यासाठी चक्क १०० रुपयांची सुपारी त्याच शाळेत शिकणाऱ्या मुलाला दिल्याच्या प्रकाराने मोठी खळबळ उडाली आहे. वेळीच नववीत शिकणाऱ्या मुलाने संबंधित विद्यार्थ्यीनीला हा प्रकार सांगितल्यानंतर हा संतापजनक प्रकार उघडकीस आला आहे. या प्रकारामुळे शिक्षण क्षेत्रासह पुणे जिल्ह्यात मोठी खळबळ उडाली आहे.

दौंडमधील एका इंग्रजी माध्यमाच्या शाळेत हा धक्कादायक प्रकार घडला असल्याची माहिती मिळत आहे. धक्कादायक बाब म्हणजे शाळेची बदनामी होऊ नये म्हणून तो प्रकार दडपण्याचा प्रयत्न शाळा प्रशासनाकडून केला गेला. मात्र, विद्यार्थीने घडलेला प्रकार घरी सांगितला आणि पालकांनी देखील पोलीस ठाण्यात धाव घेत पोलिसांना हा प्रकार सांगितला. यानंतर पोलिसांनी शाळेच्या मुख्याध्यापकासह वर्गशिक्षक व शिक्षिका यांच्यावर गुन्हा दाखल केला आहे. या प्रकारामुळे पोलीस देखील चक्रावून गेले आहेत. इतक्या लहान मनात अशा प्रकाराची विकृती येत असल्याने अनेक प्रश्न उपस्थित केले जात आहेत.

नेमकं प्रकरण काय आहे? 

मिळालेल्या माहितीनुसार, दौंडमध्ये एक इंग्रजी माध्यमाची शाळा आहे. या शाळेत वर्गातील एका विद्यार्थ्यीने पालकांची खोटी सही केली होती. ती सही करताना त्याच वर्गात शिकणाऱ्या एका विद्यार्थ्यीनीने पाहिली होती. याची माहिती तिने वर्गशिक्षिकेला दिली. याचा राग संबंधित विद्यार्थ्यांने मनात धरला होता. यानंतर या संबंधित विद्यार्थ्याने इयत्ता नववीत शिकणाऱ्या विद्यार्थ्याला संबंधित विद्यार्थ्यीनीवर अगोदर बलात्कार कर आणि नंतर तिला मारून टाक यासाटी १०० रुपयांची सुपारी दिली. ज्या विद्यार्थ्याला सुपारी दिली त्या विद्यार्थ्याने ही सर्व माहिती त्या विद्यार्थिनीला येऊन सांगितली. त्यानंतर या विद्यार्थ्यीने तिच्या घरी याची माहिती दिल्यानंतर हा संपूर्ण प्रकार उघडकीस आला.