Indapur : इंदापूरात न्यायालयीन कर्मचाऱ्यांचा संताप उसळला
Indapur : न्यायालयीन कामकाजात विविध संवर्गांतील कर्मचाऱ्यांची भूमिका महत्त्वाची असते. दैनंदिन न्यायालयीन कामकाज सुरळीत पार पाडण्यापासून ते पक्षकारांना आवश्यक सेवा उपलब्ध करून देण्यापर्यंत अनेक जबाबदाऱ्या हे कर्मचारी पार पाडतात.

इंदापूर :जिल्हा व दुय्यम न्यायालयांमधील कर्मचाऱ्यांना उच्च न्यायालयातील कर्मचाऱ्यांप्रमाणे सुधारित वेतनश्रेणी लागू करावी, या प्रमुख मागणीसाठी इंदापूर येथील जिल्हा अतिरिक्त सत्र न्यायालयासमोर न्यायालयीन कर्मचाऱ्यांनी आंदोलन केले. गेल्या अनेक महिन्यांपासून शासनदरबारी प्रलंबित असलेल्या वेतनश्रेणीच्या प्रस्तावावर अद्याप निर्णय न झाल्याने कर्मचाऱ्यांनी आंदोलनात सहभागी होत आपल्या मागण्यांकडे शासनाचे लक्ष वेधले.
‘समान काम, समान वेतन’ या तत्त्वानुसार जिल्हा व दुय्यम न्यायालयांतील कर्मचाऱ्यांनाही उच्च न्यायालयातील कर्मचाऱ्यांप्रमाणे सुधारित वेतनश्रेणी लागू करावी, अशी मागणी यावेळी करण्यात आली. समान स्वरूपाचे काम आणि जबाबदाऱ्या पार पाडणाऱ्या कर्मचाऱ्यांच्या वेतनश्रेणीतील तफावत दूर व्हावी, अशी भूमिका आंदोलनकर्त्यांनी मांडली.
न्यायालयीन कामकाजात विविध संवर्गांतील कर्मचाऱ्यांची भूमिका महत्त्वाची असते. दैनंदिन न्यायालयीन कामकाज सुरळीत पार पाडण्यापासून ते पक्षकारांना आवश्यक सेवा उपलब्ध करून देण्यापर्यंत अनेक जबाबदाऱ्या हे कर्मचारी पार पाडतात. मात्र, सुधारित वेतनश्रेणीचा प्रस्ताव अनेक महिन्यांपासून प्रलंबित असल्याने कर्मचाऱ्यांमध्ये नाराजी असल्याचे आंदोलनातून दिसून आले.
यावेळी शासनाने कर्मचाऱ्यांच्या मागण्यांचा सहानुभूतीपूर्वक आणि सकारात्मक विचार करून प्रलंबित प्रस्तावावर लवकरात लवकर निर्णय घ्यावा, अशी मागणी करण्यात आली. वेतनश्रेणीचा प्रश्न मार्गी लागावा आणि कर्मचाऱ्यांना न्याय मिळावा, या अपेक्षेने आंदोलनात सहभाग नोंदविण्यात आला. सुधारित वेतनश्रेणीचा प्रश्न आता पुन्हा चर्चेत आला असून, शासन या मागणीबाबत काय निर्णय घेते,याकडे इंदापूरमधील न्यायालयीन कर्मचाऱ्यांचे लक्ष लागले आहे.





