Pune District : नीरा पट्ट्यात पाण्यासाठी टाहो
Pune District : पाणीटंचाईची तीव्रता लक्षात घेऊन पंचायत समितीने टँकरद्वारे पाणीपुरवठ्याचा निर्णय घेतला आहे.

इंदापूर : यंदा पावसाने ओढ दिल्याने इंदापूर तालुक्यातील निरा पट्ट्यात पाणीटंचाईचे संकट अधिक गडद झाले आहे. नीरा नदीचे पात्र कोरडे पडले असून, गावोगावी विहिरी आणि बोअरवेलची पाणीपातळी खालावली आहे. परिणामी, पिण्याच्या पाण्यासाठी ग्रामस्थांची मोठी परवड सुरू झाली आहे. या गंभीर परिस्थितीची दखल घेत इंदापूर पंचायत समितीने आठ गावांतील नागरिकांची तहान भागविण्यासाठी १७ टँकर सुरू केले आहेत.
दरम्यान, आणखी चार गावांचे टँकरसाठीचे प्रस्ताव मंजुरीसाठी पाठविण्यात आल्याने नीरा पट्ट्यातील पाणीटंचाईचे संकट किती गंभीर बनले आहे, हे स्पष्ट होत आहे. तालुक्यातील निरवांगी, रेडणी, वकीलवस्ती, बावडा, निरनिमगाव, पिठेवाडी, चाकाटी आणि रुई या आठ गावांना सध्या १७ टँकरद्वारे पाणीपुरवठा केला जात आहे. पावसाअभावी नैसर्गिक जलस्रोत आटल्याने आणि गावांच्या पाणीपुरवठा योजना अपुऱ्या पडू लागल्याने नागरिकांना पिण्याच्या पाण्यासाठी वणवण करावी लागत होती. विशेषतः महिलांना पाण्यासाठी दूरवर जावे लागत असल्याने दैनंदिन जीवनावरही त्याचा परिणाम होत होता.
पाणीटंचाईचे सावट; प्रशासनाची टँकरद्वारे धाव
पाणीटंचाईची तीव्रता लक्षात घेऊन पंचायत समितीने टँकरद्वारे पाणीपुरवठ्याचा निर्णय घेतला आहे. सध्या आठ गावांमध्ये दररोज १७ टँकरच्या माध्यमातून पाणी पोहोचविले जात असून, ग्रामपंचायत स्तरावर पाण्याच्या वितरणाचे नियोजन करण्यात आले आहे. टँकरच्या फेऱ्यांवर लक्ष ठेवून नागरिकांना पुरेसे पाणी मिळावे, यासाठी स्थानिक यंत्रणा कार्यरत आहे.
दरम्यान, तालुक्यातील आणखी चार गावांमध्ये पाणीटंचाई जाणवू लागली आहे. या गावांनाही टँकरद्वारे पाणीपुरवठा सुरू करता यावा, यासाठी पंचायत समितीने प्रस्ताव वरिष्ठ कार्यालयाकडे मंजुरीसाठी सादर केले आहेत. मंजुरी मिळताच संबंधित गावांमध्ये टँकर सुरू करण्यात येणार असल्याची माहिती इंदापूर पंचायत समितीचे गटविकास अधिकारी सचिन खुडे यांनी दिली.
टँकर सुरू झाले; पण कायमस्वरूपी पाण्याचे काय?
टँकरद्वारे तात्पुरता दिलासा मिळत असला, तरी निरा पट्ट्यातील पाणीटंचाईचा प्रश्न दरवर्षी ऐरणीवर येत आहे. त्यामुळे केवळ टँकरच्या फेऱ्यांवर अवलंबून न राहता जलसंधारण, नाला खोलीकरण, बंधारे, विहीर पुनर्भरण आणि पाणीपुरवठा योजनांच्या बळकटीकरणावर भर देण्याची गरज आहे. पिण्याच्या पाण्याचा प्रश्न कायमस्वरूपी सुटावा, यासाठी लोकप्रतिनिधी, प्रशासन आणि ग्रामपंचायतींनी समन्वयाने ठोस कृती आराखडा राबवावा, अशी मागणी ग्रामस्थांमधून होत आहे.





