नवी दिल्ली – मराठा आरक्षणावरुन केंद्र-राज्य असा वाद नको आहे. न्यायालयात जे वकील दिले ते ज्येष्ठ वकिल आहेत. यावर राज्य सरकारने अध्यादेश काढला तर मराठा आंदोलन होणार नाही, असे मत राष्ट्रवादी कॉंग्रेसचे अध्यक्ष शरद पवार म्हणाले.

नवी दिल्ली येथे आयोजीत पत्रकार परिषदेत ते बोलत होते. शरद पवार म्हणाले, मराठा आरक्षणाबाबत राज्य सरकारने अध्यादेश काढायचा निर्णय घेतला, तर मार्ग निघेल. मला त्याबाबत कायदेशीर बाजू माहिती नाही, जर त्याबाबतचा पर्याय निघाला, तर मला वाटतं कोणीही रस्त्यावर उतरणार नाही, असे ते म्हणाले.

मराठा आरक्षणप्रकरणात जे वकील दिले ते ख्यातनाम होते. कपिल सिब्बल किंवा महाधिवक्ते हे ज्युनिअर आहेत का? आम्हाला समाजाला न्याय द्यायचा आहे. मला कोर्टाकडून पुन्हा न्याय मिळेल असे वातावरण हवे, असे शरद पवार म्हणाले.

अन्य राज्यात आरक्षण दिले, तर मग महाराष्ट्राने अपेक्षा केली, त्यात मला काही गैर वाटत नाही. विरोधक यात सरकारची कमतरता सांगतात, पण विरोधकांना राजकारण करायचे आहे. विरोधकांनी आंदोलन करुन काही होणार नाही. हा प्रश्न कोर्टातूनच सुटणार आहे. कोर्टाच्या निर्णयावर मी काही बोलू शकत नाही. पण आम्ही पुन्हा एकदा कोर्टात जाणार, असे त्यांनी सांगितले.