Pune : ऐन महापालिका निवडणुकीच्या तोंडावर भाजपने पुण्यात अॅापरेशन लोटसद्वारे बड्या नेत्यांना गळाला लावले असून, आज पुण्यात आमदार पुत्रासह २२ जणांचा पक्ष प्रवेश पार पडला. पुण्यात घडलेल्या या राजकीय घडामोडीमुळे सर्वांनाच आश्चर्यचकित केले आहे. महापालिका निवडणुकीपूर्वी शरद पवारांच्या राष्ट्रवादी काँग्रेस पक्षाच्या आमदाराचा मुलगा हा भाजपच्या वाटेवर असल्याची चर्चा राजकीय वर्तुळात सुरू होती. अखेर भाजपने हे प्रत्यक्षात करून दाखवलं असून शरद पवार यांच्या राष्ट्रवादी काँग्रेस पक्षाचे आमदार बापूसाहेब पठारे यांचे सुपुत्र सुरेंद्र पठारे यांनी भाजपमध्ये पक्ष प्रवेश केला आहे. हे सर्व पक्ष प्रवेश पक्षाचे प्रदेशाध्यक्ष रवींद्र चव्हाण यांच्या प्रमुख उपस्थित पार पडले. तसेच खडकवासला विधानसभेच्या निवडणुकीत विद्यमान आमदार भीमराव तापकीर यांना कडवी झुंडे देणारे शरद पवार यांच्या राष्ट्रवादी काँग्रेस पक्षाचे सचिन दोडके हे देखील भाजपात गेले आहेत. हे दोन पक्ष प्रवेश शरद पवार यांच्यासाठी धक्का देणारे आहेत. तसेच सायली वांजळे, विकास दांगट सारख्या अनेक नेत्यांनी देखील हाती कमळ घेतले आहे. यामुळे आता भाजपची ताकद पुण्यात आणखी वाढली आहे. ‘या’ नेत्यांचे पार पडले पक्ष प्रवेश वडगाव शेरीचे आमदार बापू पठारे यांचे पुत्र सुरेंद्र पठारे, माजी नगरसेविका रोहिणी चिकटे, माजी नगरसेवक सचिन दोडके, माजी नगरसेवक बाळासाहेब धनकवडे, सायली रमेश वांजळे, विकास दांगट, नारायण गलांडे, माजी मंत्री वसंतराव चव्हाण यांचे चिरंजीव कणव चव्हाण, खंडू लोंढे, पायल तुपे, प्रतिभा चोरगे, शुभांगी ढोले, संतोष मते, प्रशांत तुपे, विराज तुपे, अनिल तुपे, इंदिरा तुपे यांनी भाजपमध्ये जाहीर प्रवेश केला आहे. त्याचप्रमाणे मुळशीमधील भानुदास पानसरे, गणेश पानसरे, संतोष पानसरे, कृष्णकुमार पानसरे, आनंद माझिरे, सुहास पानसरे, किरण साठे आणि सचिन पानसरे यांनी देखील यावेळी प्रवेश केला आहे. हेही वाचा : Til Jaggery Ladoo: हिवाळ्यात घरच्या घरी बनवा तिळ-गुळाचे लाडू; खाल्ल्यावर मिळेल उष्णता आणि हाडांना बळ
