पुणे : खडकवासला धरण साखळीतील पाणीसाठा गेल्या वर्षाच्या तुलनेत निम्म्यापेक्षाही कमी आहे. शहराला पाणीपुरवठा करणाऱ्या धरण साखळीत गेल्या तीन-चार दिवसांपासून पाऊस पडत असला तरी सध्या चारही धरणांत मिळून केवळ 3.29 टीएमसी पाणीसाठा आहे. गेल्या वर्षी हाच साठा 7.84 टीएमसी होता.

खडकवासला धरण साखळीच्या चारही धरणांच्या पाणलोट क्षेत्रात पावसाने विश्रांती घेतली आहे. गेल्या महिनाभरात आजपर्यंत, खडकवासला परिसरात 10.5 मिमी पाऊस झाला आहे. हा पाऊस सरासरीच्या केवळ 6 टक्‍के आहे. दुसरीकडे यंदाचा उन्हाळा गेल्या 122 वर्षांत सर्वात प्रखर होता. त्यामुळे पाण्याचे बाष्पीभवनही वेगाने झाले झाले आहे. त्यातच यंदा पूर्व मान्सून पावसानेही पाठ फिरवल्याने याचा परिणात धरण क्षेत्रातील पाणीसाठ्यावर झाला आहे.

गेल्या पाच वर्षांतील स्थिती
वर्ष आणि टीएमसी
2017  –   2.86
2018  –   3.15
2019  –   3.00
2020  –   5.81
2021  –  7.84
2022  –  3.29