राजगुरूनगर, (प्रतिनिधी) – पक्षाच्या हितासाठी आणि वळसे पाटील यांच्या नेतृत्वाखाली लोकसभेचे उमेदवार माजी खासदार शिवाजी आढळराव पाटील यांचे काम करण्याबाबत खेडचे आमदार मोहिते पाटील यांची भूमिका ठरली असून बुधवारी (दि. 20) उपमुख्यमंत्री अजित पवार यांच्या उपस्थितीत कार्यकर्त्यांचा मेळावा घेण्यात येणार असल्याची माहिती राष्ट्रवादी काँग्रेसच्या पदाधिकार्यांनी दिली. विरोध असतानाही पक्षश्रेष्ठींनी आढळराव पाटील यांना उमेदवारी देण्याचा निर्णय घेतला आहे. पक्षहितासाठी, तालुक्यातील कार्यकर्त्यांसाठी आढळराव पाटील यांचे लोकसभेला काम करणार आहे. यासाठी बुधवारी तालुक्यातील निवडक कार्यकर्त्यांचा मेळावा आयोजित करण्यात आला आहे. उपमुख्यमंत्री अजित पवार यावेळी उपस्थित राहून मार्गदर्शन करणार आहेत. तर कार्यकर्ते आपली भूमिका स्पष्ट करतील, असे आमदार दिलीप मोहिते पाटील यांनी सांगितले. शिरूर लोकसभा मतदार संघाच्या उमेदवारी साठी सोमवारी (दि. 18) मुंबई येथे विशेष बैठक झाली. त्यात उपमुख्यमंत्री अजित पवार, सहकारमंत्री दिलीप वळसे पाटील, विलास लांडे, प्रदीप कंद आणि भोसरी, शिरूर वगळता सर्व आमदार उपस्थित होते. यावेळी आढळराव पाटील यांच्या उमेदवारीबाबत चर्चा झाली. त्यानुसार आढळराव पाटील यांची उमेदवारी जवळपास निश्चित झाली आहे. मी माझ्या भूमिकेशी ठाम आहे; पण पक्षाच्या हितासाठी अजित पवार सांगतील ते काम करणार आहे. लोकसभेला खेड नेहमीच निर्णायक भूमिका घेतो; मात्र राजकीय निर्णयप्रक्रियेत वरिष्ठांकडून खेड वर कायमच दुर्लक्ष केले जाते, असा आरोप आमदार दिलीप मोहिते पाटील यांनी करीत आपली नाराजी व्यक्त केली. आढळरावांचा आज राष्ट्रवादीत प्रवेश शिंदे शिवसेनेचे उपनेते माजी खासदार शिवाजीराव आढळराव पाटील यांच्या राष्ट्रवादी काँग्रेसच्या प्रवेश पार्श्वभूमीवर खेड तालुक्यातील कार्यकर्त्यांचा मेळावा घेण्यात येत आहे. उपमुख्यमंत्री अजित पवार यांच्या उपस्थितीत हा मेळावा झाल्यानंतर त्यांना लगोलग सोयीचे व्हावे यासाठी जुन्नर तालुक्यातील कार्यकर्त्यांचा मेळावा खेड तालुक्यात आयोजित करण्यात आला आहे. पुणे नाशिक महामार्गावरील हॉटेल राजरत्न येथे होणार्या या मेळाव्याचे आयोजन आमदार अतुल बेनके समर्थकांनी केल्याचे सांगण्यात येत आहे.
