Online Gambling – कोरेगाव भीमा (ता. शिरूर) आणि केंदूर (ता. शिरूर) येथे मोबाइलवर आयडी व कोड देऊन पैशांच्या माध्यमातून ऑनलाइन पद्धतीने खेळवल्या जाणाऱ्या फनटारगेट व बिंगो जुगारावर दहशतवाद विरोधी पथक आणि शिक्रापूर पोलिसांनी मोठी कारवाई केली आहे. या छाप्यात पोलिसांनी अमोल जयसिंग साकोरे, अक्षय रघुनाथ साकोरे आणि चंद्रकांत रिटे या तिघांविरुद्ध गुन्हा दाखल केला असून त्यांच्याकडून मोबाइल व रोख रक्कम असा एकूण ३ लाख ८३ हजार रुपयांचा मुद्देमाल हस्तगत केला आहे. मिळालेली माहिती अशी की, कोरेगाव भीमा व केंदूर परिसरात दोन युवक लोकांना मोबाइलवर बेकायदेशीररित्या ऑनलाइन जुगार खेळवत असल्याची माहिती दहशतवाद विरोधी पथकाला मिळाली होती. त्यानुसार सहायक पोलीस निरीक्षक प्रकाश पवार, सहायक पोलीस उपनिरीक्षक विशाल गव्हाणे, पोलीस हवालदार निलेश कदम, विशाल भोरडे, गणेश चंदनशिव, ओंकार शिंदे आणि शिक्रापूर पोलिसचे धनंजय थेऊरकर व विशाल देशमुख यांच्या पथकाने या ठिकाणी छापा टाकला. पोलिसांनी कोरेगाव भीमातून अमोल साकोरे आणि केंदूर येथून अक्षय साकोरे या दोघांना ताब्यात घेतले. दरम्यान असे समोर आले की, हे दोघे बारामती येथील चंद्रकांत रिटे याला पैसे पाठवून मोबाइलवर आयडी व कोड मिळवत असत. त्यानंतर ते अन्य लोकांना हा आयडी व कोड देऊन त्यांच्याकडून पैसे स्वीकारून ऑनलाइन जुगार खेळवत होते. पोलिसांनी या कारवाईत ५ महागडे मोबाइल आणि १ लाख ५३ हजार रुपयांची रोख रक्कम जप्त केली आहे. याप्रकरणी सहायक पोलीस उपनिरीक्षक विशाल गव्हाणे यांनी दिलेल्या फिर्यादीवरून शिक्रापूर पोलिसाचे गुन्हा नोंदवण्यात आला असून, सहायक पोलीस उपनिरीक्षक धनंजय थेऊरकर पुढील तपास करत आहेत.
