OnePlus Nord 6 : वनप्लस ( OnePlus ) कंपनीने मंगळवारी (७ एप्रिल २०२६) आपला नवा स्मार्टफोन OnePlus Nord 6 भारतात लॉन्च केला. हा फोन मागील वर्षी आलेल्या Nord 5 चा उत्तराधिकारी असून मिड-प्रिमियम ग्राहकांना लक्षात घेऊन सादर करण्यात आला आहे. या फोनचे सर्वात मोठे वैशिष्ट्य म्हणजे तब्बल ९,००० mAh क्षमतेची बॅटरी. यासोबत बॉक्समध्ये ८०W SUPERVOOC फास्ट चार्जर देण्यात आला असून २७W वायर्ड रिव्हर्स चार्जिंगलाही सपोर्ट आहे. OnePlus Nord 6 ला पाणी व धूळ प्रतिरोधक IP66, IP68, IP69 आणि IP69K असे चार रेटिंग्स मिळाले आहेत. डिस्प्लेच्या बाबतीत, या फोनमध्ये ६.७८ इंचाचा 1.5K AMOLED स्क्रीन असून १६५Hz रिफ्रेश रेट देण्यात आला आहे. हाय ब्राइटनेस मोड (HBM) १,८०० निट्सपर्यंत असून पीक ब्राइटनेस ३,६०० निट्सपर्यंत जाते. गेमिंगसाठी हा फोन BGMI, Call of Duty Mobile आणि Free Fire सारख्या गेम्समध्ये सतत १६५ FPS सपोर्ट देतो, असा दावा कंपनीने केला आहे. परफॉर्मन्ससाठी फोनमध्ये ४nm तंत्रज्ञानावर आधारित Snapdragon 8s Gen 4 प्रोसेसर देण्यात आला आहे. यामध्ये १२GB पर्यंत RAM आणि २५६GB UFS 4.1 स्टोरेजचा पर्याय उपलब्ध आहे. हा फोन OxygenOS 16 वर चालतो, जो Android 16 वर आधारित आहे. कॅमेराच्या बाबतीत, फोनमध्ये ५० मेगापिक्सेलचा मुख्य कॅमेरा आणि ८ मेगापिक्सेलचा अल्ट्रावाइड लेन्स देण्यात आला आहे. सेल्फीसाठी ३२ मेगापिक्सेलचा फ्रंट कॅमेरा आहे. OnePlus Nord 6 हा Holographic Quick Silver, Fresh Mint आणि Low-Reflection Pitch Black या तीन रंगांमध्ये उपलब्ध होणार आहे. हा फोन ९ एप्रिलपासून कंपनीच्या अधिकृत वेबसाइट आणि Amazon वर विक्रीसाठी उपलब्ध होईल. किंमतीबाबत, ८GB RAM व २५६GB स्टोरेज असलेला बेस व्हेरिएंट ₹३८,९९९ पासून सुरू होतो, तर १२GB RAM व २५६GB स्टोरेज असलेला व्हेरिएंट ₹४१,९९९ किंमतीत उपलब्ध असेल.
