नवी दिल्ली: देशातील बँका, विमा कंपन्या, म्युच्युअल फंड आणि डिव्हिडंड्स (लाभांश) मध्ये तब्बल एक लाख कोटींहून अधिक रक्कम अनक्लेम्ड (दावेदार नसलेली) अवस्थेत पडून आहे, अशी महत्त्वपूर्ण माहिती पंतप्रधान नरेंद्र मोदी यांनी दिली आहे. ही प्रचंड रक्कम कोट्यवधी कुटुंबांच्या कष्टाची आणि गुंतवणुकीची कमाई असून, ती त्यांच्या मालकांपर्यंत पोहोचवणे हे सरकारचे मुख्य उद्दिष्ट आहे.

बँकांमध्ये सर्वाधिक ७८ हजार कोटी –
पंतप्रधान मोदींनी या बेवारस धनाचा तपशील देताना सांगितले की, इंडियन बँकांमध्ये नागरिकांचे ७८,००० कोटी रुपये अनक्लेम्ड बँक ठेवी म्हणून आहेत. याशिवाय, विमा कंपन्यांकडे सुमारे १४,००० कोटी रुपये अनक्लेम्ड आहेत, तर म्युच्युअल फंड कंपन्यांमध्ये ३,००० कोटी रुपये आणि ९,००० कोटी रुपयांचे डिव्हिडंड्स देखील दावेदार नसलेल्या स्थितीत आहेत.

पंतप्रधानांनी स्पष्ट केले की, ही समस्या दूर करण्यासाठी आणि प्रत्येक नागरिकाला त्याचे हक्काचे पैसे परत मिळवून देण्यासाठी सरकारने “आपका पैसा, आपका अधिकार” ही विशेष मोहीम ऑक्टोबर २०२५ मध्ये सुरू केली आहे.

या फंडचा शोध घेण्याची आणि त्यावर दावा करण्याची प्रक्रिया सुलभ व पारदर्शक करण्यासाठी सरकारने अनेक डेडिकेटेड पोर्टल्स तयार केले आहेत. नागरिकांना खालील लिंक्सचा वापर करून आपली अनक्लेम्ड रक्कम तपासता येईल.

Here is a chance to convert a forgotten financial asset into a new opportunity.

Take part in the ‘Your Money, Your Right’ movement! https://t.co/4Td6wyz99i@LinkedIn

— Narendra Modi (@narendramodi) December 10, 2025

बँक ठेवी: udgam.rbi.org.in/unclaimed-deposits/

विमा पॉलिसी: bimabharosa.irdai.gov.in/

म्युच्युअल फंड: app.mfcentral.com/

डिव्हिडंड्स/शेअर्स: http://www.iepf.gov.in/

या प्रक्रियेला बळ देण्यासाठी, डिसेंबर २०२५ पर्यंत ग्रामीण आणि शहरी भागातील ४७७ जिल्ह्यांमध्ये सुविधा कॅम्प आयोजित करण्यात आले आहेत. पंतप्रधान मोदींनी समाधान व्यक्त केले की, सरकार आणि नियामक संस्थांच्या एकत्रित प्रयत्नांमुळे आतापर्यंत जवळपास २,००० कोटी रुपये त्यांच्या मूळ मालकांना परत करण्यात आले आहेत.

“आम्ही ही मोहीम येत्या काळात आणखी मोठी करू इच्छितो,” असे सांगून त्यांनी देशवासियांना कळकळीची विनंती केली की, त्यांनी स्वतः आणि त्यांच्या कुटुंबाच्या नावे असलेले अनक्लेम्ड डिपॉझिट्स, विमा पॉलिसीचे पैसे किंवा गुंतवणूक त्वरित तपासावी आणि आपले हक्काचे धन परत मिळवावे.