केंदूर : मुखई (ता. शिरूर) येथे समाजकंटकांने स्प्रिंकलरच्या पाइपलाइनमध्ये घातक तणनाशक मिसळून भाऊसाहेब बाबासाहेब येवले यांच्या दीड एकर क्षेत्रातील मेथीचा नाश केला. सध्या ही मेथी करपण्यास सुरुवात झाली आहे. बाजारभावानुसार सुमारे दोन ते अडीच लाख रुपयांचे नुकसान झाल्याचे शेतकरी येवले यांनी सांगितले. जुन्या वैमनस्यातून हा प्रकार झाल्याचा संशय व्यक्त करण्यात आला आहे.

येवले यांनी (दि.2) रोजी दीड एकर क्षेत्रात ७० किलो मेथी बियाण्याची पेरणी केली होती. पिकाला स्प्रिंकलरद्वारे पाणी देण्याची व्यवस्था केली होती. पीक 15 दिवसांचे झाले असताना, (दि.19) रोजी सायंकाळी साडेसहानंतर समाजकंटकांनी पाइपलाइनमध्ये घातक तणनाशक टाकून ठेवल्याचा त्यांचा आरोप आहे. दुसऱ्या दिवशी सकाळी स्प्रिंकलर सुरू करून पाणी दिल्यानंतर हे रसायन संपूर्ण दीड एकर क्षेत्रात पसरल्याचा संशय आहे.

दोन दिवसांनंतर मेथी पिकावर परिणाम दिसू लागला. पिकाची पाने जळून करपण्यास सुरुवात झाल्याचे लक्षात येताच येवले यांनी पोलिसांच्या आपत्कालीन क्रमांकावर संपर्क साधला. त्यानंतर त्यांनी या प्रकरणी तक्रार दाखल केली. आणखी 15 दिवसांत मेथीचे पीक काढणीस येणार होते. मात्र, हातातोंडाशी आलेले पीक वाया जाण्याची भीती निर्माण झाली आहे. सध्या बाजारभावानुसार दोन ते अडीच लाख रुपयांचे नुकसान झाले आहे.

आर्थिक बोजा अन्‌ दुष्काळी स्थिती

संपूर्ण जिल्हा दुष्काळाने होरपळत आहे. शेतकरी आधीच आर्थिक संकटाचा सामना करत आहे. मेहनतीने उभे केलेले पीक अशा प्रकारामुळे धोक्यात आल्याने मुखई परिसरातून संताप व्यक्त होत आहे. पाइपलाइनमध्ये नेमके कोणते रसायन मिसळले, हा प्रकार कोणी केला, त्यामागे काय उद्देश होता, याची सखोल चौकशी करून दोषींवर कठोर कारवाई करावी, अशी मागणी येवले यांनी केली आहे. शेतकऱ्यांच्या पिकांचे जाणीवपूर्वक नुकसान करणाऱ्या प्रवृत्तींना वेळीच आळा घालावा, अन्यथा भविष्यात अशा घटनांमुळे शेतकऱ्यांचे कधीही भरून न येणारे नुकसान होऊ शकते, अशी चिंता शेतकऱ्यांनी व्यक्त केल्या आहेत.