जालना : राज्यात विधानसभा निवडणुकीच्या मतदानासाठी काही दिवस शिल्लक राहिले आहेत. 20 नोव्हेंबर रोजी राज्यात मतदान पार पडणार आहे. 18 नोव्हेंबरला प्रचार संपत असल्याने राज्यात प्रचाराला वेग आला आहे. यादरम्यान ओबीसी नेते लक्ष्मण हाके यांनी शरद पवारांवर जोरदार हल्लाबोल केला आहे.

काय म्हणाले लक्ष्मण हाके?
शरद पवार यांनीच महाराष्ट्राच्या मानगुटीवर जरांगे नावाचं भूत बसवलं, अशी टीका ओबीसी आरक्षण आंदोलक लक्ष्मण हाके यांनी केली. शरद पवार यांना मराठा समाजाच्या, ओबीसीच्या आरक्षणाचे काहीही पडलेले नाही. त्यांना फक्त आपल्या लेकीला मुख्यमंत्री करायचे आहे अशी टीका लक्ष्मण हाके यांनी केली आहे.

विशालगडावर मशीद पाडताना संभाजी भोसले चिथावणीखोर भाषण करत होता. एकही धनगर आमदार-खासदार झाला नाही. आमचा पाठिंबा आमच्या उमेदवारांना आहे. दगडापेक्षा वीट मऊ म्हणून आम्ही महायुती कडे जाऊ, असेदेखील हाके म्हणाले आहेत.

जालन्यात उमेदवाराला दिला पाठिंबा
जालना येथे ओबीसी आंदोलक लक्ष्मण हाके यांनी अपक्ष उमेदवार अशोक पांगारकर यांना पाठिंबा दिला आहे. जालन्यात अपक्ष उमेदवार पांगारकर यांनी ठेवलेल्या दिवाळी स्नेहमिलन कार्यक्रमात सहभागी होऊन ओबीसी आंदोलक लक्ष्मण हाके यांनी ओबीसी समाजाने अपक्ष उमेदवाराच्या पाठीशी उभे राहण्याचे यावेळी आवाहन केले.