पुणे –शहरातील कचरा व्यवस्थापनाच्या नावाखाली आता महापालिका प्रशासनाकडून संगणक प्रणाली विकसित करण्यात येणार आहे. त्यासाठी 15 कोटींचा खर्च पुणेकरांच्या माथी मारला जाणार आहे. या संगणकीकरणाचे काम मुंबईतील एका कंपनीस देण्यास महापालिका आयुक्‍तांनी प्रशासक म्हणून मागील आठवड्यात झालेल्या स्थायी समिती बैठकीत मान्यता दिली आहे. त्यानुसार, संबंधित कंपनीस हे काम करण्यासाठी अडीच वर्षांची मुदत देण्यात आली असून त्यानंतर पुढील तीन वर्षे ही कंपनीच देखभाल दुरुस्ती करणार असल्याचे प्रस्तावात नमूद आहे. स्मार्ट सिटी आणि पुणे महापालिकेस 15 वित्त आयोगातून मंजूर झालेल्या निधीतून हा खर्च केला जाणार आहे.

शहरात दररोज सुमारे 2,200 ते 2,300 मेट्रिक टन कचरा तयार होतो. महापालिकेकडून या कचऱ्याचे संकलन, त्याची वाहतूक, प्रक्रिया करणे तसेच शास्त्रोक्‍त पद्धतीने विल्हेवाट लावणे अशाप्रकारे नियोजन केले जाते. त्यात संकलन व वाहतुकीसाठी सुमारे 3,500 “स्वच्छ’चे सेवक असून 700 वाहतुकीची वाहने आहेत. त्यानंतर हा कचरा पालिकेच्या वेगवेगळ्या रॅम्पवरून शहरातील महापालिकेच्या प्रक्रिया प्रकल्पांच्या ठिकाणी पाठविला जातो. तसेच शास्त्रोक्‍त पद्धतीने केल्या जाणाऱ्या भू- भरावातही जिरविला जातो. या सर्व प्रक्रियेत जवळपास 9 हजार कर्मचारी कार्यरत आहेत. या सर्व कामाचे एकत्रित संगणकीकरण करण्यात येणार असून त्यासाठी प्रशासनाने ही निविदा काढली होती.

आधीच्या प्रणालीचे काय?
महापालिकेने या पूर्वीच घनकचरा व्यवस्थपान विभागाच्या कामकाजात नियोजन आणण्यासाठी पालिकेच्या सर्व कचरा वाहनांना जीपीएस प्रणाली लावली आहे. तसेच प्रकल्पांचेही संगणीकरण केले आहे. याशिवाय, कर्मचाऱ्यांना हजेरीसाठी बायोमेट्रिक प्रणालीही वारंवार लावली आहे. त्यामुळे आधीच महापालिकेकडून या बाबींवर वेळोवेळी खर्च करण्यात आला आहे. त्यानंतर आता एकीकृत संगणक प्रणालीच्या नावाने पुन्हा या विभागाचे संगणीकरण करण्याचा घाट घातला असल्याची चर्चा प्रशासकीय वर्तुळात आहे.

काय करणार काम?
निविदेनुसार, संबंधित काम दिलेली संस्था शहरातील झाडणकाम, घरोघरी जाऊन कचरा संकलन, कचरा वाहतूक व्यवस्थापन, पालिकेचे कचरा प्रकल्प, सार्वजनिक व व्यावसायिक शौचालये, घनकचरा विभागाकडील कर्मचाऱ्यांच्या हजेरी, बिलांचे काम यासाठी संगणक प्रणाली विकसित करणार आहे. तसेच त्यासाठी आवश्‍यक असलेली जीपीएस प्रणाली, रेडीओ फ्रिक्वेन्सी आयडेंटीटीफिकेशन यंत्रणा ही कंपनी महापालिकेस पुरविणार आहे.